Bıyl Taldyqorǵanda birneshe nysan el ıgiligine beriledi
TALDYQORǴAN.QazAqparat - Qazir Taldyqorǵan qalasynda qurylys qarqyndy júrip jatyr. Bıyldyń ózinde birneshe nysan paıdalanýǵa beriledi, dep habarlaıdy QazAqparat tilshisi.
Búgin Almaty oblysy ákiminiń mindetin atqarýshy Lázzat Turlashov pen Taldyqorǵan qalasynyń ákimi Baǵdat Qarasaev qaladaǵy qurylys nysandaryn aralady.
Ákimder bastaǵan top aldymen 6-shaǵyn aýdanda salynǵan 168 páterli kópqabatty úıdiń qurylys barysymen tanysty. Turǵyn úı kesheniniń jalpy quny 918 mln teńgeden asady. Úıler naýryz meıramy qarsańynda tapsyrylmaq.
Ekinshi nysan - qalanyń ońtústik batys bóliginde salynyp jatqan Kórme kesheni. Munda negizgi jumystardyń barlyǵy aıaqtalǵan. Endi ishki árleý, aýlasyn abattandyrý isteri qalǵan. Ǵımarat jýyrda qoldanysqa berilmek.
Kelesi nysan - jańa drama teatr. Búginde onyń irgetasy quıylyp, qabyrǵalary turǵyzylyp jatyr. Jospar boıynsha teatr 2018 jyldyń jazynda qoldanysqa berilmek.
Osy mańda salynyp jatqan Saltanat saraıy da bıyl kúzde qoldanysqa beriletin bolady. Jalpy quny 900 mln teńgeden asatyn nysan qalanyń kóz tartar kórikti ǵımarattarynyń biri bolmaq.
Ákimder toby toqtalǵan sońǵy nysan - etnoaýyl. Bul da bıyl qoldanysqa berilmek. Jalpy quny - 280 mln teńge turady.
«Búgin biz aralaǵan ǵımarattardyń deni keleshek Taldyqorǵannyń kelbeti bolady. Sondyqtan, qurylys nysandaryndaǵy jumys sapasy únemi baqylaýda bolýy kerek»,-dep atap ótti Turlashev.
Sondaı-aq, oblys ákiminiń mindetin atqarýshy mundaı tekserýler endi ár senbi saıyn ótetinin aıtty.
