Bıyl Taldyqorǵan-Óskemen, Taldyqorǵan-Dostyq joldarynyń qurylysy bastalady
ASTANA. QazAqparat - Bıyl Taldyqorǵan-Óskemen, Taldyqorǵan-Dostyq joldarynyń qurylysy bastalady. Bul týraly búgin Úkimettiń kezekten tys otyrysynan keıingi baspasóz máslıhatynda Investıtsııalar jáne damý mınıstri Jeńis Qasymbek málim etti, dep habarlaıdy QazAqparat.
«Nurly jol» baǵdarlamasy aıasynda 2016 jyly respýblıkalyq mańyzy bar uzyndyǵy 913 shaqyrym jolda jumystar aıaqtaldy. Ol jumystarda 75 myń adam jumys istedi. Bıyl 4,5 myń shaqyrym jolda jóndeý jumystaryn jalǵastyramyz. Jyldyń sońyna deıin 600 shaqyrymda ýchaskeler boıynsha aıaqtaımyz dep josparlaýdamyz. Byltyr Astana-Temirtaý, jáne Almaty-Qapshaǵaı joldaryn bitirdik. Endi Kúrti, Býrylbaıtal odan ary Balqash baǵytynda júrgizemiz. Astanadan Óskemenge baratyn joldyń eń úlken jumystary Astana men Pavlodardyń ortasynda júrgiziledi. Bıyl ýchaskelerdiń basym bóliginde jumystardy bitiremiz. Bir-eki problemaly ýchaskeler bar. Olar boıynsha sheshimder qabyldanýda», - dedi Jeńis Qasymbek.
Sonymen qatar ol bıyl qolǵa alynǵan jańa joldardyń qurylysyna da egjeı-tegjeıli toqtalyp ótti.
«Bıyl eki jańa joba bar. Ol Taldyqorǵannan Óskemenge, Taldyqorǵannan Dostyqqa baratyn joldar. Bul jańa jobalar bıyl bastaldy, ony 3 jyldyń ishinde bitiremiz dep otyrmyz. Aqtóbe-Atyraý ary qaraı Astrahan jaqqa baratyn jol bar. Bul joldyń eki ýchaskesinde jumystardy bylyr bastadyq. Qalǵandarynda osy jyldyń 2-3 toqsanynda qurylys jumystary bastalady dep kútilýde. Mańǵystaý oblysynda Beıneýden Shetpege baratyn joldy byltyr bitirdik. Endi Shetpeden Jetibaı, ary qaraı Aqtaýǵa baratyn jol boıynsha jumystar júrgizilýde. Josparymyzǵa sáıkes kelesi jyly aıaqtalady», - dedi mınıstr.
