Bıyl sút salasyn sýbsıdııalaýǵa 24,9 mlrd teńge bólindi

ASTANA. QazAqparat - Jyl basynan beri Qazaqstanda shamamen 5,5 mln tonna sút óndirildi, bul ótken jylǵy kórsetkishtermen salystyrǵanda 2,1 %-ǵa óskenin kórsetedi, dep habarlaıdy QazAqparat.

Aýyl sharýashylyǵy mınıstrliginiń málimetinshe, taýarlyq sút óndirisiniń naqty kólemi 3,4 mln tonnany qurady, bul da bir jyl burynǵydan 1,3% -ǵa artyq.

«Sońǵy eki jylda óńdelgen súttiń ózindik qunynyń ortasha eseppen 50 teńgege, 2022 jylǵy qarashada 197-200 teńgege deıin ósýi baıqalady. Kásiporyndardaǵy satý baǵasy 235-ten 300 teńgege deıin jetti.

Qarasha aıynda qymbattaýdyń negizgi sebebi jem baǵasynyń ósýimen baılanysty ekeni belgili boldy, bul ózindik qunnyń 70%-yn quraıdy. Sonymen qatar, ımporttyq shyǵyn materıaldary, sonyń ishinde qaptama ydystar qymbattady», - dep jazdy vedomstvodan.

Sút pen sút ónimderiniń qymbattaýy maýsymdyq sıpatqa ıe.

Sonymen qatar, bıyl sút salasyn sýbsıdııalaýǵa shamamen 24,9 mlrd teńge bólindi, onyń ishinde sút óndirýge 18,6 mlrd teńge baǵyttaldy. Atalǵan memlekettik qoldaýdy salanyń 467 sýbektisi, onyń ishinde sút-taýar fermalary men ÁKK-lar paıdalandy.