Bıyl sý tapshylyǵy ótkir sezilýde – QR AShM
«Bıyl jahandyq klımattyq ózgeristerdiń áserinen, sondaı-aq kórshiles elderdiń antropogendik áserinen sýarmaly sýdyń tapshylyǵy ótkir sezilýde. Aýyl sharýashylyǵy mınıstrligin jekelegen óńirlerdegi sýarmaly jerlerdi sýmen qamtýdaǵy kúrdeli jaǵdaı alańdatady. Sebebi bul sharýalar arasynda áleýmettik shıelenis týǵyzýda. Oblys ákimdikteriniń jedel derekteri boıynsha, jazdyq daqyldar 21 mln gektar alańǵa nemese jospardyń 100,6% egildi», - dep jazylǵan mınıstrliktiń resmı jaýabynda.
Onyń ishinde dándi daqyldar –15,7 mln gektar jerge, maıly daqyldar – 3,3 mln gektarǵa, kartop – 197,6 myń gektarǵa, kókónis-baqsha daqyldary – 286 myń gektarǵa, azyqtyq daqyldar 1,1 mln gektarǵa egilgen.
Sondaı-aq mınıstrlik kóktemgi-dala jumystaryn júrgizýge bar jaǵdaı jasalǵanyn, sharýalar qajetti resýrstarmen qamtylǵanyn atap ótti.
Bıylǵy aqpan jáne maýsym aılarynda kóktemgi dala jumystary máseleleri QR Úkimetiniń otyrystarynda qaralǵan.
«Qazaqstan qaýipti eginshilik aımaǵynda ornalasqan, onyń ishinde astyq egetin negizgi óńirler: Aqmola, Qostanaı, Soltústik Qazaqstan oblystary. Sondyqtan aýyl sharýashylyǵy daqyldarynyń ónimdiligi men óndiris kólemi kúzgi jáne qysqy ylǵaldyń jınalýyna, kóktem men jaz mezgilinde jaýyn-shashynnyń túsýine, kóktemgi egis jumystarynyń ýaqtylyǵy men sapasyna, daqyldardy kútý boıynsha agrotehnıkalyq is-sharalarǵa jáne egin jınaý naýqanyna baılanysty», - deıdi mınıstrlik.
