Bıyl SQO jumys kúshi kóp óńirlerden 2,5 myń adamdy qabyldamaq
SQO Jumyspen qamtýdy úılestirý jáne áleýmettik baǵdarlamalar basqarmasy baspasóz qyzmetiniń málimetinshe, «Eńbek» baǵdarlamasy aıasynda SQO-ǵa bıyl jyl basynan 524 adam, ıaǵnı 162 otbasy jumys kúshi kóp óńirlerden qonys aýdardy. Kelgenderdiń 258 bala, 8 stýdent jáne 11-i zeınetker, qalǵany eńbekke qabiletti jasta. Olardyń barlyǵy qabyldaý kvotasyna engizildi. Kóship kelgenderdiń 109-y búgingi kúni turaqty jumysqa ornalassa, 26 adam jeke kásibin ashty.
«Qonys aýdarýshylar óz kásibin ashý úshin grant ala alady. Mıkronesıe alýǵa múmkindikteri bar. Bul úshin olarǵa «Bastaý Bıznes» baǵdarlamasyna qatysýdyń qajeti joq. Turǵylyqty mekenjaıy boıynsha jumyspen qamtý ortalyǵyna júginip, sol jerge qujattaryn tapsyrady, bıznes ıdeıalaryn usynady», - deıdi SQO Jumyspen qamtýdy úılestirý jáne áleýmettik baǵdarlamalar basqarmasynyń baspasóz hatshysy Nazerke Tasqulova.
Jalpy SQO bıyl 700-den astam otbasyny, 2500-den astam adamdy qabyldaýdy josparlap otyr. Krıterıı boıynsha otbasynda kem degende 4 adam bolýy qajet, onyń ekeýi jumysqa qabiletti. Baspanaǵa ornalastyrǵanda da otbasy quramyna qaraıdy. Budan basqa qonys aýdarýshylarǵa sýbsıdııa beriledi.
«Bıyl mamyr aıynan bastap sýbsıdııanyń kólemi eki ese ulǵaıtyldy. Qazirgi tańda 70 AEK-ti quraıdy. Sonymen qatar kommýnaldyq shyǵyndaryn óteýge 15-30 AEK mólsherinde sýbsıdııa beriledi. Munyń bári otbasynyń ár múshesine esepteledi», - deıdi Nazerke Tasqulova.
Byltyr pandemııaǵa baılanysty SQO-ǵa nebary 600-ge jýyq adam ǵana memlekettik baǵdarlama aıasynda qonys aýdardy.
