Bıyl SQO joldarynda 12 adam qaza taýyp, 100-ge jýyǵy jaraqattandy
PETROPAVL. QazAqparat – Soltústik Qazaqstan oblysynda «Qaýipsiz jol» jedel-profılaktıkalyq is-sharasy ótip, nátıjesinde 53 mas júrgizýshi ustaldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, 12 shilde kúni tańerteń Petropavldyń patrýldik polıtsııa batalonynyń qyzmetkerleri N.Nazarbaev kóshesinde «Audi» avtokóligin toqtatty. Rýlde 23 jastaǵy júrgizýshi bolǵan. Jigitten alkogol ıisi sezilgen, medıtsınalyq kýálandyrý onyń mastyǵyn kórsetti.
Sol kúni sot úkimimen júrgizýshi 15 táýlikke ákimshilik qamaýǵa alyndy. Budan bólek, ol aldaǵy 7 jylda kólik basqara almaıtyn boldy.
Polıtseıler sońǵy 10 kúnniń ishinde oblys joldarynda osyndaı 53 mas júrgizýshini ustady.
«Shildeniń 2-si men 11-i aralyǵynda ótkizilgen oblystyq «Qaýipsiz jol» jedel-profılaktıkalyq is-sharasynyń maqsaty – jol-kólik oqıǵalarynyń qaýpin tómendetý. Jyl basynan oblysta 80 jol-kólik oqıǵasy tirkeldi, saldarynan 12 adam qaza taýyp, 99-y jaraqat aldy. 11 jol-kólik oqıǵasynda kiná mas júrgizýshilerden, olardyń kesirinen 2 adam kóz jumyp, 15 adam jaraqattandy», - deıdi SQO polıtsııa departamenti bastyǵynyń birinshi orynbasary Qanat Aıtbaev.
Jedel-profılaktıkalyq is-sharanyń 10 kúninde jolda júrý erejesin buzýdyń 4,5 myńnan astam deregi anyqtaldy. Sonyń ishinde manevr jasaýǵa qatysty – 131, baǵdarshamnyń tyıym salynǵan belgisine ótip ketýdiń 72 faktisi jáne dál sonshama apattyq jaǵdaıdy jasaý faktisi, sondaı-aq jyldamdyqty asyrýdyń 389 faktisi tirkeldi.
