Bıyl SQO tártip saqshylary arasynda 9 polıtseı para alǵan
SQO polıtsııa departamenti baspasóz qyzmetiniń málimetinshe, bıyl polıtsııa qatarynda sybaılas jemqorlyq sıpattaǵy 9 fakti anyqtalsa, bul ótken jyldyń uqsas kezeńimen salystyrǵanda 40% tómen.
«Bıyl sybaılas jemqorlyqqa jol berý azaıǵan. Buǵan polıtsııa qyzmetkerleriniń jumysyna tsıfrlyq tehnologııalardy engizý, profılaktıkalyq jumys, ashyqtyq pen qoljetimdilik prıntsıpi yqpal etti. Polıtsııanyń halyqpen baılanys ornatýynyń jańa túri tikeleı qarym-qatynasty joıýǵa múmkindik beredi. Qazirgi tańda ishki ister organdary kórsetetin memlekettik qyzmetterdiń jartysynan astamy elektrondy formatqa kóshirilgen», - deıdi SQO PD ózindik qaýipsizdik basqarmasynyń bastyǵy Arman Atanov.
Sybaılas jemqorlyqty azaıtýǵa jol qaýipsizdigin nyǵaıtý maqsatynda engizilip jatqan tehnıkalyq jańalyqtar da kómektesken.
Qazir Petropavldaǵy 7 kóshe qıylysynda ıntellektýaldyq júıe men 43 jyldamdyq ólsheýish bar.
Patrýldik polıtsııanyń barlyq qyzmetkerleri beınetirkegish, planshet, avtomashına – statsıonarlyq beınekamermen jabdyqtalǵan.
Sonymen qatar, halyqpen keri baılanys ornatýda áleýmettik jelilerdegi paraqshalardyń bereri mol.
SQO PD bastyǵy Marat Tólebaevtyń jeke akkaýntyna 20-dan astam ótinish kelip tústi.
Óńir turǵyndary ınternet arqyly ózindik qaýipsizdik qyzmet basqarmasynyń bastyǵyna, SQO ishki ister organdarynyń basqarmalary men aýmaqtyq bólinisteriniń basshylaryna tikeleı júgine alady.
Budan basqa, polıtseılerdiń quqyqqa syıymsyz is-áreketi jaıly PD ÓQB 8 7152 61-26-89 senim telefonyna habarlasyp, +7-700-161-26-89 WhatsApp nómiri arqyly habarlama jiberýge bolady.
