Bıyl SQO-nyń 32 aýylyna taza sý jetkiziledi
PETROPAVL. QazAqparat - SQO-nyń 32 eldimekenine aýyz sý jetkiziledi, dep habarlaıdy QazAqparat tilshisi.
Turǵyndardy taza aýyz sýmen qamtamasyz etý máselesi SQO ákimdiginiń otyrysynda talqylandy. Qazir óńirdegi turǵyndardyń 89,8% ortalyq sý júıesine qosylǵan. Byltyr taza sý 38 aýylǵa keldi.
SQO ákimi baspasóz qyzmetiniń habarlaýynsha, bıyl bul baǵytqa 9,1 mlrd teńge baǵyttalmaq, qarjy kólemi 40 paıyzǵa ósti. Bıyl 32 aýylǵa sý jetkizý josparlanǵan. «Aýyl - el besigi» baǵdarlamasy aıasynda 5 aýdandaǵy 27 aýylda sý taratý júıeleri salynady. Petropavldyń jeke sektoryn da ortalyq sý júıesine qosý josparda bar.
«Petropavlda qazir 20 myń úı bar. Jeke sektordaǵy bul úılerdiń 72 paıyzy ortalyq sý júıesine qosylmaǵan. Qosý quny 200-500 myń teńge turady. Bul qymbat. Qala basshylyǵynan úılerdi ortalyq sý júıesine qosý boıynsha ońtaıly usynystar kútemin», - dedi oblys ákimi Qumar Aqsaqalov.
Oblys basshysy eldi mekender ishinde de sý taratý júıesi salyný kerek degen pikirde.
«Sýdy aýylǵa ǵana tartý jetkiliksiz. Kolonkalardy barynsha úılerge jaqyn etip ornalastyrý qajet. «Aýyl - el besigi» baǵdarlamasy aıasynda 27 eldimekende sý taratý jelisi salynady. Biz aýyldardyń sanyn arttyrýǵa daıynbyz. Úılerge kirgizýge de kómektesemiz. Alaıda bul jumystar turǵyny kóp eldimekenderde júrgiziletin bolady», - deıdi ákim. 
