Bıyl SQO-ǵa qonys aýdarǵandardy baspanamen qamtýǵa 2 mlrd teńge bólindi

PETROPAVL. QazAqparat – Soltústik Qazaqstan oblysynda depýtattar «Nur Otan» saılaýaldy baǵdarlamasy boıynsha atqarylǵan jumysty qorytyndylady, dep habarlaıdy QazAqparat tilshisi.

«Nur Otan» partııasy SQO fılıaly baspasóz qyzmetiniń málimetinshe, partııanyń depýtattyq fraktsııasynyń músheleri saılaýaldy baǵdarlamany iske asyrý jónindegi jol kartalarynyń oryndalýynyń aldyn ala qorytyndysyn shyǵardy.

Óńirlik jáne aýmaqtyq saılaýaldy baǵdarlamalardy taldaı kele, osy jyldyń 8 aıynda belgilengen 1134 is-sharanyń 192-si, ıaǵnı 17 %-ynyń oryndalǵany, 726-synyń – 64 %-ynyń júzege asyrylyp jatqany jáne 216 is-shara boıynsha, bul – 19 %, oryndaý merziminiń áli jetpegeni anyqtalǵan.

Іske asqan mańyzdy jobalardyń biri - Petropavlda «CLAAS» kompanııasynyń aýyl sharýashylyǵy tehnıkasyn qurastyrý zaýytynyń, Petropavl elektrtehnıkalyq zaýytynyń, 210 orynǵa shaqtalǵan juqpaly aýrýlar aýrýhanasynyń ashylýy jáne «Radýga» JShS qýaty 2,1 myń tonna bolatyn kóterme-taratý ortalyǵynyń paıdalanýǵa berilýi.

Sonymen qatar, jol kartalary aıasynda «Maslodel» JShS jańa óndiristik jelisi iske qosylyp, jylyna 66 myń tonna ýltrapasterlengen sút jáne 1,8 myń tonna qaımaq shyǵaratyn boldy.

Aqjar aýdanynda «Aqnıet Agro ı K» JShS un tartý tsehy salyndy jáne Shal aqyn aýdanynda dene shynyqtyrý-saýyqtyrý kesheni ashyldy.

Sonymen qatar, fraktsııa músheleri «Eńbek» memlekettik baǵdarlamasyn júzege asyrý máselesin talqylady. Bıyl bul maqsatqa respýblıkalyq bıýdjetten 1 939,7 mln teńge bólingen.

«Qazirgi ýaqytta oblys aýdandarynda 242 úı satyp alynbaq, onyń 66-sy satyp alyndy, 48-i daıyn tur, 120-synyń qabyrǵasy qalansa, 8 úıdiń irgetasy quıyldy. Bir úıdi satyp alýǵa 8 mln teńge bólingen», - deıdi oblystyq máslıhattaǵy «Nur Otan» depýtattyq fraktsııasynyń jetekshisi Ásem Rahmetova.