Bıyl SQO-da jańa medıtsınalyq qondyrǵylar alýǵa 2,4 mlrd teńge jumsalady
PETROPAVL. QazAqparat – Soltústik Qazaqstan oblysynyń emdeý mekemeleri zamanaýı qondyrǵylarmen qamtylyp jatyr. Bıyl osy maqsatqa 2,4 mlrd teńge bólindi, dep habarlaıdy QazAqparat tilshisi.
Soltústik Qazaqstan oblysy ákiminiń baspasóz qyzmetiniń málimetinshe, búgin óńir basshysy Qumar Aqsaqalov oblystyq kópsalaly aýrýhanaǵa ornatylǵan jańa MRT apparatynyń jumysymen tanysty. Byltyr oblys ákimi óńirdegi emdeý mekemeleriniń jumysymen tanysý barysynda syrqattardyń MRT-dan ótýi úshin aılap kezek kútýi aqylǵa syımaıtyndyǵyn, bul máseleniń sheshiletindigin aıtqan edi.
«Zamanaýı qondyrǵyda dıagnostıka júrgizilip jatyr. Oblystyq aýrýhanada endi osyndaı 2 apparat jumys isteıdi. Jyl sońyna deıin onkodıspanserge úshinshi MRT qoıylady. Bul kezek sanyn biraz qysqartýǵa múmkindik bermek», - deıdi oblys ákimi Qumar Aqsaqalov.
Sońǵy jyldary oblysta qondyrǵylardy jańartýǵa qarjy kóp quıylýda. 2018 jyly osy maqsatqa 636 mln teńge bólinse, byltyr 2,8 mlrd teńge baǵyttaldy. Bıyl 2,4 mlrd teńge jumsalmaq. Aýrýhanalarǵa zamanaýı tomograf, angıograf, mammograf pen ÝZI, rentgen apparattar alynýda. Endi soltústikqazaqstandyqtarǵa dıagnostıka jasatý úshin basqa óńirlerge barýdyń qajeti joq.
Byltyr oblystyq aýrýhanaǵa kompıýterlik tomograf ornatyldy. Kelesi jyly Petropavldaǵy kópsalaly qalalyq aýrýhanaǵa osyndaı ekeý jáne Ǵ. Músirepov aýdanyndaǵy ortalyq aýrýhanaǵa bireý qoıylmaq.
Bıyl oblystyq Kardıologııalyq ortalyqqa zamanaýı tsıfrlyq angıograf alynyp, dárigerler birer aıdyń ishinde 500-den astam sátti operatsııa jasady. Osyndaı angıograf jaqynda oblystyq aýrýhanada da paıda bolmaq.
Onkologııalyq dıspanserge alynǵan mammograf obyr indetin erte kezeńnen anyqtaýǵa múmkindik beredi. Mundaı qondyrǵynyń taǵy tórteýi aýdandarǵa jiberildi.
Sondaı-aq Mercedes reanımobılderi satyp alyndy, jaqynda olardyń qatary Hyundai arnaıy mashınalarymen tolyǵady.
