Bıyl SQO-da maldyń asa qaýipti aýrýlary 3 ese azaıdy
PETROPAVL. QazAqparat – Soltústik Qazaqstan oblysynda byltyr maldyń asa qaýipti aýrýlary 65 pýnktte tirkelse, bıyl 19-ynda anyqtalǵan, dep habarlaıdy QazAqparat tilshisi.
SQO-daǵy qaýipti mal aýrýlary boıynsha epızootıkalyq jaǵdaı ákimdikte ótken jıynda aıtyldy. SQO veterınarııa basqarmasynyń málimetinshe, bıyl óńirde sibir jarasynyń bir jaǵdaıy tirkeldi. Aqjar aýdany Gorkovskoe eldi mekenindegi «Aq-Nıet Agro» JShS iri qara mal aýyryp, dereý is-sharalar kesheni ótkizildi, oshaq oqshaýlandy, halyqqa jáne sharýashylyqqa zalal kelgen joq.
Al brýtsellezge bıyl 400-den astam iri qara shaldyqqan. Bul ótken jylmen salystyrǵanda eki ese az. Aýrý mal soıyldy. Ielerine ótemaqy tólenip jatyr. Óńirde qaýipti aýrýdyń alty oshaǵy bar.
«Keı aýdandarda brýtsellezge shaldyqqan mal sany kóbeıdi. Qyzyljar aýdanynda - 99, Esilde - 89, Shal aqynda - 26. Árbir jaǵdaı boıynsha zertteý júrgizildi. Aýrýdyń taralýynyń negizgi sebebi maldy veterınarııalyq qyzmettiń ruqsatynsyz tasymaldaý. Máselen mamyr aıynda Aıyrtaý aýdanyna Mańǵystaýdan ákelingen 410 sıyrdyń 35-nen brýtsellez anyqtaldy. 23-iniń saraptamasy kúmándi boldy. Sol sebepti maldy óńirge ákelmes buryn tekserip alý qajet», - deıdi SQO ákimi Qumar Aqsaqalov.
Janýarlar arasynda qutyrma aýrýyna kúdikti 35 jaǵdaı tirkeldi.Olardyń 11-iniń dıagnozy rastaldy. Infektsııa jabaıy ańdardan juqqan. Aýrýdyń aldyn alý úshin 45,3 myń túlik pen ıt-mysyq qutyrmaǵa qarsy egildi. Sondaı-aq qarasha-jeltoqsan aılarynda qaýipti aımaqtarda vaktsınatsııalaý úshin preparattyń 108 myń dozasyn qosymsha bólý týraly Aýyl sharýashylyǵy mınıstrligine ótinim jiberildi.
