Bıyl SQO-da bes aýyl kolledjine 1,3 mlrd teńgeniń jabdyǵy alyndy

PETROPAVL. QazAqparat – Soltústik Qazaqstan oblysynda «Jas maman» jobasy aıasynda bıyl bes aýyl kolledjiniń materıaldyq-tehnıkalyq bazasy jaqsaryp, 1,3 mlrd teńgeniń zamanaýı qondyrǵylarymen jabdyqtaldy, dep habarlaıdy QazAqparat tilshisi.

«Nur Otan» partııasy SQO fılıaly janynan qurylǵan bilim jáne ǵylymdy damytý boıynsha qoǵamdyq keńestiń otyrysynda «Jas maman» jobasy aıasynda atqarylǵan jumys qorytyndylandy.

«Jas maman» jobasy oblysta bıyl ekinshi jyl júzege asyp jatyr. Baıqaý negizinde byltyr suranysqa ıe 100 mamandyqty daıarlaıtyn 4 kolledj tańdap alyndy.

Olar: M.Jumabaev joǵary kolledji, Soltústik Qazaqstan kásibı-pedagogıkalyq kolledji, Petropavl qurylys-ekonomıkalyq kolledji jáne Petropavldyń mashına jasaý kolledji.

Bıyl bul oqý oryndarynyń qataryna bes aýyl kolledji qosyldy.

Esil, Aıyrtaý, Ǵ.Músirepov atyndaǵy jáne Taıynsha aýdanyndaǵy kolledjder aýyl sharýashylyǵyna qajetti mamandardy daıarlaıdy, besinshisi - M.Jumabaev aýdanyndaǵy kásibı daıarlyq jáne servıs kolledji.

«Jabdyqtar satyp alynbas buryn WorldSkills standarttary eskerilip, suranysqa ıe 100 ındýstrııalyq jáne servıstik mamandyqtar negizinde qalyptastyryldy jáne jumys berýshilermen, salalyq qaýymdastyqtarmen, óńirlik kásipkerler palatasymen kelisildi. Kolledjder buıryq shyǵaryp, qondyrǵylardy qabyldaý jónindegi komıssııalar quryldy. Onyń quramyna qalalyq, oblystyq máslıhattardyń depýtattary, óńirlik kásipkerler palatasynyń, qoǵamdyq birlestikterdiń ókilderi endi», - deıdi SQO bilim basqarmasy basshysynyń orynbasary Vladımır Tkachenko.

Byltyr Petropavldyń 4 kolledjine 1,1 mlrd teńgeniń zamanaýı jabdyqtary satyp alyndy.

Bıyl osy maqsatqa «Jas maman» jobasy aıasynda 1,3 mlrd teńge bólindi.

Qazirgi ýaqytta konkýrstar tolyq ótkizildi, qajetti qondyrǵylardyń basym bóligi oqý oryndaryna jetkizildi.

Jergilikti bıýdjetten bul oqý oryndaryna 179,5 mln teńge bólindi. Bul qarajat jabdyqtardy montajdaýǵa jáne basqa da maqsattarǵa jumsaldy.