Bıyl SQO-da baspanasyz júrgen 126 kópbalaly otbasy qonys toıyn toılady

PETROPAVL. QazAqparat – Soltústik Qazaqstan oblysynda bıyl 8 myńnan astam adam óziniń turǵyn úı jaǵdaıyn jaqsartsa, onyń 126-sy – kópbalaly otbasylar, dep habarlaıdy QazAqparat tilshisi.

SQO ákimi Qumar Aqsaqalovtyń sózine qaraǵanda, óńirde qurylys salasy qarqyn alǵan. Bıyl 2240 páter paıdalanýǵa berildi, jańa jylǵa meje – onyń sanyn 3 myńǵa jetkizý.

«7-20-25» baǵdarlamasy aıasynda ǵana bıyl 851 páter berildi. Halyq 464 baspanany 3,2 mlrd teńgege satyp aldy. Sondaı-aq baspanaǵa kezekte turǵan kópbalaly 126 otbasy qonys toıyn toılady. Aldaǵy úsh jylda olardyń páter máselesin tolyq sheshemiz. Biz áli de turǵyn úıdi jetkilikti deńgeıde salyp jatqanymyz joq. Aımaqta qazir jylyna 400 myń sharshy metr baspana turǵyzamyz. Al qajettilikti tolyq óteý úshin bul kórsetkishti 1,7 esege arttyrý kerek. Ony júzege asyrýǵa bizde barlyq múmkindik bar», - dedi Qumar Aqsaqalov.

Petropavldaǵy «Jas órken» yqsham aýdany sońǵy birer jylda tanymastaı ózgerdi. Qalanyń bul bóliginde zamanaýı oqýshylar saraıy, tennıs ortalyǵy, A.Vınokýrov atyndaǵy sport saraıy boı kóterdi. Kópqabatty úıler paıda bolyp, oblys ortalyǵynda alǵash ret 18 qabatty turǵyn úılerdiń qurylysy qolǵa alyndy. Keler jyly jańa teatr salynyp bitedi.

Jańa jylda qala kórkin qashyrǵan jeke sektordaǵy 467 úı syrylyp, nátıjesinde 54,8 ga bosatylmaq. Bul jerde kópqabatty úıler turǵyzylady dep josparlanǵan.

Oblys ortalyǵyndaǵy «Bereke», «ıÝbıleınyı», «Solnechnyı» yqsham aýdandarynda da qurylys qyzǵan. Keler jyly «Shyǵys» jáne «Kopaı» yqsham aýdandary damytylyp, qurylys qarqyn almaq.

«Aýyldyq jerlerde de turǵyn úı qurylysy júrip jatyr. Bıyl 428 baspana turǵyzyldy. Aldaǵy eki jylda taǵy 1714 úı salynady. Bul jumystar óńirden ketýshilerdiń sanyn azaıtpaqshy. 2016 jylmen salystyrǵanda, kóshkenderdiń sany 40% kemidi», - dedi Qumar Aqsaqalov.