Bıyl shymkenttik 54 otbasy soltústik oblystarǵa qonys aýdarady

ShYMKENT. QazAqparat - Shymkentten soltústikke kósh jalǵasyp jatyr. Kadr tapshylyǵyn tartqan pavlodarlyq delegatsııa eńbekqor shymqalalyqtarǵa usynyspen kelip, ál-Farabı aýdany ákimdiginde jergilikti halyqpen kezdesý ótkizdi, dep habarlaıdy QazAqparat tilshisi.

Qonaqtar turǵyndarǵa soltústikke qonys aýdarý sharttary túgel qamtylǵan memlekettik baǵdarlamany egjeı-tegjeıli túsindirdi. 40 shaqty bos jumys ornyn usynyp otyrǵan pavlodarlyqtar 100-den asa otbasyn baspanamen qamtýǵa ázir ekendikterin jetkizdi. Aıtýlarynsha, qonys aýdaratyn otbasyna bir rettik járdemaqy men baspanany jalǵa alý aqysy jáne kommýnaldyq tólemderi tólenedi. Bul kómekter «Nátıjeli jumyspen qamtý jáne jappaı kásipkerlikti damytýdyń 2017 - 2021 jyldarǵa arnalǵan baǵdarlamasy» aıasynda júzege asyrylmaq.

Aıta keteıik, ótken jyly Shymkent qalalyq jumyspen qamtý ortalyǵynyń mamandary ótinish bildirgen 81 otbasyn Soltústik Qazaqstan, Qostanaı, Pavlodar, Shyǵys Qazaqstan oblystaryna qonys aýdarýǵa yqpal etken. Eńbekke qabiletti 300-ge jýyq azamat turaqty jumyspen qamtylǵan. Olar búginde muǵalim, dáriger, agronom sııaqty túrli mamandyqtar boıynsha jumysqa ornalasyp, tipti keıbireýleri jeke kásibin dóńgelentip otyr.

Sala mamandarynyń sózinshe, jeri qunarly, sýly da nýly soltústik jerinde aýyl sharýashylyǵyn túletýge múmkindik mol. Al, jyl sońyna deıin 200-den asa múshesi bar 54 otbasyn soltústikke kóshirý josparlanyp otyr.