Bıyl Shymkentte 225 kóshe jóndeledi
ShYMKENT. QazAqparat - Bıyl Shymkentte 225 kóshe jóndeledi. Bul týraly búgin qalalyq jolaýshylar kóligi jáne avtomobıl joldary bóliminiń basshysy Qýatjan Jumataev málim etti. Onyń sózinshe, jóndeý jumystaryna bıýdjetten 5,4 mlrd. teńge qaralǵan, dep xabarlaıdy QazAqparat tilshisi.
Oblys ortalyǵyndaǵy joldardyń máselesin kótergen jıynda bólim basshysy aldaǵy josparlaryna toqtaldy. Máselen, aǵymdaǵy jyly jol qurylysy jáne tehnıkalyq qyzmet kórsetý jumystaryna 13,7 mlrd. teńge qarajat qarastyrylǵan. Qalaǵa qarasty Abaı aýdanyndaǵy 105 kóshede ortasha jáne kúrdeli jóndeý jumystary júrgizilip, 4 kóshede aıaqjoldar salynady. Al, Eńbekshi, Qarataý, Ál-Farabı aýdandarynda tıisinshe 120 kóshede jóndeý jumystary atqarylady dep kútilýde.
Qala joldaryn odan ári kóriktendirý úshin 5 mlrd qarjy bólinip, sarapshylar jańa jobalardy ázirlegen. Oǵan sáıkes, jańadan jaıaý júrginshilerge arnalǵan joldar salynyp, Astana jáne Respýblıka dańǵyldaryn jańǵyrtý jumystary júrgiziledi.
«Osy jyly jeti magıstraldy kósheniń qaıta qurý jumystary bastalady. Bul jumystarǵa 8,7 mlrd. teńge shamasynda qarajat qaralǵan. Olar: Tórequlov, Jibek Joly, Baıtursynov, Tassaı shaǵynaýdanyndaǵy Táýke Han kósheleri jáne A-2 tas joly. Sonymen qatar, «Samal» bazarynyń janynda jáne Respýblıka dańǵylyndaǵy HQKO-nyń aldynda jer asty jaıaý júrginshiler ótpeleri salynady. Osyǵan qosa Temirlan tas joly boıynda jol aıyryǵyn salý jumystary bastalady»,- dedi Q. Jumataev.
Bólim basshysy sondaı-aq shaharda birneshe nysan paıdalanýǵa beriledi dep otyr. Atap aıtqanda, Momyshuly kóshesi (Súleımenov k.-nen Qojanov k. deıin), Ál-Farabı, Qojanov, Arǵynbekov kóshelerindegi qaıta qurý jumystary jáne Temirlan tas joly men Mangeldın kóshesiniń qıylysyndaǵy jer asty jaıaý júrginshiler ótkeli ashylady. Sonymen qatar, kólik ınfraqurylymynyń damýyna baǵyttalǵan birqatar jobalardyń smetalyq qujattamalary daıyndalýda. Onyń ishinde, Badam ózenindegi avtokólik kópirin qaıta jóndeý, birqatar shaǵyn aýdandardaǵy kóshelerdi kúrdeli jóndeýden ótkizý men Qonaev dańǵylynyń jalǵasynyń qurý jumystary qolǵa alynbaq.
