Bıyl shegirtkege qarsy kúreske 2,5 mlrd teńge jumsalady

NUR-SULTAN. QazAqparat – Bıyl zııankes shegirtkemen kúres sharalaryna respýblıkalyq jáne jergilikti bıýdjetterden 2,5 mlrd teńge jumsalady, dep habarlaıdy QazAqparat tilshisi.

Bul týraly QR Aýyl sharýashylyǵy mınıstrligi Agroónerkásiptik keshendegi memlekettik ınspektsııa komıtetiniń tóraǵasy Almabek Mars ortalyq kommýnıkatsııalar qyzmetinde ótken brıfıngide aıtty.

«Respbýlıka aýmaǵynda erekshe qaýipti organızmniń 12 túri, zııandy organızmniń 5 túri, karantındik obektilerdiń 14 túri taralǵan. Shegirtkelermen kúresýge erekshe kóńil bólinedi. Bıyl úıirli shegirtke 997 myń gektar aımaqqa taralǵan. Onyń ishinde ıtalııalyq prýs – 760 myń, azııalyq shegirtke 201 myń jáne marokko shegirtkesi - 35 myń gektarǵa taralǵan. Sonymen qatar saıaq shegirtke zııankesteri 271 myń gektar alańda baıqalǵan. Jalpy shegirtkelerge qarsy respýblıka bıýdjetinen 1,9 mlrd teńge, jergilikti bıýdjetten 659 mln teńge bólindi», - dedi ol.

Aıtýynsha atalǵan qarajat pestıtsıdter men hımııalyq óńdeý qyzmetterin qajetti mólsherde satyp alýǵa múmkindik bergen.

«Úıirli shegirtkelerge qarsy óńdeý jumystaryn tıimdi júrgizý úshin ár túrli toptaǵy pestıtsıdter satyp alyndy. Oblys ákimdikterimen birlesip, aımaq ákimderiniń orynbasaralary basqaratyn jedel shtabtar quryldy», - dedi ınspektsııa basshysy.

Buǵan deıin habarlaǵanymyzdaı, SQO-da pestıtsıd saqtaý talabyn buzǵandarǵa 7,5 mln teńge aıyppul salyndy.