Bıyl shegirtke qaýpi artýy múmkin - AShM

ASTANA. QazAqparat - QR Aýyl sharýashylyǵy mınıstrliginiń keńeıtilgen alqa májilisinde vedomstvonyń vıtse-mınıstri Gúlmıra  Isaeva 2018 jyly shegirtkeniń taralý qaýpine qatysty máselelerdi kóterdi, dep habarlaıdy «QazAqparat» HAA tilshisi.

«Aǵymdaǵy jyly shegirtkege qatysty jaǵdaı qıyn bolatyn sekildi. Birinshiden, shegirtkeniń taralýy Jambyl, Ońtústik Qazaqstan jáne Shyǵys Qazaqstan oblystarynda boljanyp otyr. Bıyl osy zııankesterdiń 1,9 mln gektarǵa taralýy múmkin degen qaýip bar», - dedi G. Isaeva.

Sonymen qatar ol ótken jyldyń qarashasynda memlekettik satyp alýlardaǵy zańbuzýshylyqtyń saldarynan preparattardy satyp alý jumystary iske asyrylmaǵanyn jetkizdi.

«Qazirgi kezde biz mınıstrlik pen ákimdikterdiń ózara is-qımylynyń josparyn ázirleýdemiz. Osy oraıda shegirtkeniń taralýyna tosqaýyl qoıýdyń sharalaryna aıryqsha mán berilip otyr», - dedi G.Isaeva.

Óz kezeginde QR Premer-Mınıstriniń orynbasary - Aýyl sharýashylyǵy mınıstri Ómirzaq Shókeev shegirtkemen kúrestegi kemshilikterge pikirin bildirdi.

«Shegirtke boıynsha jaǵdaı birshama nazardan tys qalǵan. Tenderler ýaqytyly ótkizilmeıdi. Shynyn aıtqanda, bul baǵyttaǵy sharalar túsiniksizdeý. Shegirtkege qatysty másele óte mańyzdy. Qazirgi kezde saladaǵy mán-jaı tekserilip, aıqyndalatyn bolady. Sondyqtan aldyn ala eshteńe aıta almaımyn», - dedi Shókeev.

Osy oraıda ol ońtústik óńirlerdegi ahýalǵa tyńǵylyqty qaraýdy tapsyrdy.

«Qazirgi kezde biz komandany qurdyq, basqa vertıkaldy qalyptastyrýdamyz. Shuǵyl túrde barlyq qajetti preparattardy satyp alýmen aınalysý kerek. Eki aptadan keıin maǵan atqarylǵan jumystardy baıandap berińizder, ásirese, Ońtústik Qazaqstan, Jambyl, Shyǵys Qazaqstandaǵy is-qımyldar jaıynda málimet qajet», - dedi Ómirzaq Shókeev.