Bıyl Semeıdiń 14 kóshesi jóndeýden ótedi
SEMEI. QazAqparat - Bıyl Semeıdiń joldaryn jóndeý úshin byltyrmen salystyrǵanda eki ese kóp qarajat bólinip otyr.
Josparǵa saı, 14 kóshede orta, 80 kóshede aǵymdaǵy jóndeý jumystary júrgiziledi. Bul týraly QazAqparat ShQO ákiminiń baspasóz qyzmetine silteme jasap habarlaıdy.
Aǵymdaǵy jyly Semeıdiń ortalyq bóligi jáne Jamaqaev pen Shmıdt atyndaǵy kóshelerge deıingi Lenın kóshesiniń aýmaǵyn abattandyrý josparlanǵan. Sondaı-aq, qalada jaǵajaı jasaý úshin jobalyq-smetalyq qujattamalar ázirlený ústinde. Budan bólek, gúlzarlar, aǵashtar otyrǵyzylyp, saıabaqtar, skverler men alańdardy kórkeıtý isi de jalǵasyn tabady.
Oblys ákiminiń tapsyrmasy boıynsha, «Meniń aýlam» baǵdarlamasy aıasynda bıyl 611 mıllıon teńgege kópqabatty turǵyn úılerdegi 62 aýla abattandyrylady. Aýlaishilik aýmaqtar asfalttalyp, jaryqtandyrý, aǵash otyrǵyzý, sport jáne balalar oıyn alańyn ornatý sııaqty birqatar jumystar atqarylady.
«Bıyl Semeıdi abattandyrýǵa 2017 jylmen salystyrǵanda 500 mln teńgege, al jol jóndeýge 1 mlrd teńgege kóp qarjy bólindi. Bul óte jaqsy. Qalany kógaldandyrý isine erekshe kóńil bólý kerek. Sonymen qatar, ortalyq saıabaqty jóndeý jobasyn qaıta qaraýdy tapsyramyn. Zamanaýı standarttarǵa, qazirgi kúnniń talabyna saı bolýy tıis. Qyrýar qarajat bólinýde, sondyqtan jumys sapaly ári ýaqtyly atqarylýy tıis», - dep atap ótti Danıal Ahmetov.
Aǵymdaǵy jóndeý jumysy qaladaǵy 70 kóshede júrgiziledi. Jaqyn ýaqytta orta jóndeý 20 shaqyrymdy quraıtyn 14 kóshede bastalady. Mıchýrın, Belibaev, Ormandy kósheleriniń júrgin bóligi men trotýarlary kúrdeli jóndeýden ótedi.
