Bıyl «Saıran» kóliniń túbi tazartylyp, aýmaǵy abattandyrylady - Almaty ákimi

ALMATY. QazAqparat – Almatyda «Saıran» kóliniń túbi tazartylyp, aýmaǵy abattandyrylady. Bul týraly Almaty qalasynyń ákimi Erbolat Dosaev Áýezov aýdanynyń turǵyndarymen kezdesý kezinde aıtty, dep habarlaıdy QazAqparat tilshisi.

Ákimniń aıtýynsha «Saıran» kóli búkil Almaty qalasy úshin erekshe oryn bolyp tabylady.

«1971-jyldan bastap, ıaǵnı sý qoımasy salynǵannan beri munda rekonstrýktsııalaý jáne abattandyrý boıynsha aýqymdy jumystar júrmegen. Biz bıyl aqpan aıynan bastap aýdany - 50 ga bolatyn Saıran kóliniń túbin shógindilerden mehanıkalyq tazartý jumystaryn bastaımyz. Josparǵa sáıkes jumystardy mamyr aıynyń sońyna deıin aıaqtaımyz», - dedi qala ákimi.

Ol, sondaı-aq kóldiń aýmaǵyn abattandyrý jumystary jaıly aıtty.

«Bıyl naýryz aıynda jobalaý-smetalyq qujattamasy ázirlenip, saraptamasy shyǵyp, osy jyldyń úshinshi toqsanynda konkýrstyq rásimder aıaqtalǵan soń, «Saıran» kóliniń aýmaǵyn rekonstrýktsııalaýdy jáne abattandyrýdy bastaımyz», - dedi Erbolat Dosaev.