Bıyl saıası qýǵyn-súrgin qurbandaryna qatysty 47 jınaq shyǵarylady

NUR-SULTAN. QazAqparat – Bıyl saıası qýǵyn-súrgin qurbandaryna qatysty 47 jınaq shyǵarylady. Bul jaıynda Májilis depýtattarynyń saýalyna QR Premer-Mınıstri Álıhan Smaıylovtyń jaýabynda aıtylǵan, dep habarlaıdy QazAqparat tilshisi.

«Qazirgi ýaqytta Saıası qýǵyn-súrgin qurbandaryn tolyq aqtaý jónindegi memlekettik komıssııa (budan ári – Memlekettik komıssııa) jumys isteıdi. Onyń negizgi mindeti - 1920-1950 jyldardaǵy saıası qýǵyn-súrgin qurbandaryn tolyq, quqyqtyq jáne saıası aqtaý. Memlekettik komıssııanyń jumysy aıasynda Bas prokýratýra 2,4 mln-nan astam qujatty, Joǵarǵy sot 1086 arhıvtik isti, Іshki ister mınıstrligi 5 myń qujatty qupııasyzdandyrdy. Ulttyq qaýipsizdik komıteti saıası qýǵyn-súrginderge baılanysty 5,5 myń materıaldy jarııa etti jáne memlekettik qaýipsizdik organdarynyń 229 normatıvtik quqyqtyq aktini qupııasyzdandyrdy», - dedi Úkimet basshysy jaýabynda.

Onyń atap ótýinshe, Memlekettik komıssııanyń baspa qyzmeti josparyna sáıkes, 2021 jyly 5 myń danadan turatyn «Óte qupııa» atty eki jınaq shyǵaryldy. Olar: Qupııasyzdandyrylǵan normatıvtik quqyqtyq aktiler jáne 1920-1930 jyldardaǵy baılardy, kýlaktar men serednıaktardy tárkileý jáne kýlaktardy tárkileý boıynsha qujattar men materıaldar.

«2022 jyly 47 kitap, monografııa men jınaq shyǵarý kózdelgen. Memlekettik komıssııa qýǵyn-súrginge ushyraǵan adamdardyń jańa sanattaryn aıqyndap, olardyń ǵylymı-saraptamalyq negizdemesi berilgen qorytyndyny daıyndady. Ǵalymdar men sarapshylar qoldanystaǵy zańnamamen qamtylmaǵan 10-nan astam jańa sanatty aıqyndady. Sonymen qatar Memlekettik komıssııa aqtaý, tarıhı ádilettilikti qalpyna keltirý, táýelsizdik úshin kúreskerlerdiń esimderin jańǵyrtý boıynsha jumystardy jalǵastyrýda», - dedi Álıhan Smaıylov.