Bıyl sáýirde volonterlikti damytý jol kartasy qabyldanady
«Memleket basshysy Qasym-Jomart Kemeluly Toqaevtyń bastamasymen jarııalanǵan Volonter jyly elimizdegi volonterlik qozǵalystyń damýyna jańa serpin berdi. Júrgizilgen jumystar nátıjesinde volonterlik uıymdar men toptardyń sany 600-den asyp, volonterler 200 myńǵa jetti. Pandemııa jaǵdaıynda volonterler 1 mıllıonnan astam muqtaj jandarǵa kómek kórsetýge atsalysty», - dedi Úkimet basshysynyń orynbasary.
Onyń atap ótýinshe, volonterlik uıymdar júıeli túrde damytylyp, olardyń jumysyn úılestirý úshin barlyq óńirlerde jáne respýblıkalyq deńgeıde arnaıy frontofıster iske qosyldy. Volonter jylyn ótkizýge arnalǵan jalpyulttyq is-sharalar jospary aıasynda 8 myńnan astam volonter arnaı oqý kýrstary men semınar-trenıngterden ótti.
«Qazirgi tańda Volonterlikti damytýdyń 2021-2023 jyldarǵa arnalǵan Jol kartasy (ári qaraı – Jol kartasy) ázirlenýde. Qujat memlekettik organdarmen kelisilýde jáne osy jyldyń sáýir aıynda qabyldanatyn bolady. Jol kartasynda depýtattyq saýalda aıtylǵan usynystar tolyq qamtylǵan. Atap aıtqanda, Jol kartasyna sáıkes Volonterlik qyzmetti qoldaý standarty volonterler qyzmetin úılestirýshi front-ofısterdiń, sarapshylardyń qatysýymen ázirlenedi jáne onda volonterlerdi uıymdastyrýshylyq, quqyqtyq, ádistemelik jáne aqparattyq qoldaý tetikteri qarastyrylatyn bolady», - dedi Eraly Toǵjanov.
Sonymen qatar, ol volonterlik qyzmet pen qaıyrymdylyqty qoldaý tetikterin jetildirýge baǵyttalǵan zań jobasy ázirlenip jatqanyn aıtady.
«Onyń aıasynda volonterlik salasyndaǵy ýákiletti organǵa Volonterlik qyzmetti qoldaý standartyn qabyldaý quzyrettiligi beriledi. Zań jobasy osy jyldyń qyrkúıek aıynda Parlament Májilisiniń qaraýyna engiziledi. Jol kartasynda barlyq bilim berý uıymdarynda volonterlik jáne qaıyrymdylyq qyzmet negizderi boıynsha oqý taqyryptary men fakýltatıvtik saǵattaryn engizý qarastyrylǵan», - dedi Premer-Mınıstrdiń orynbasary.
