Bıyl satyp alynǵan qyzmettik kólikterdiń 100%-y Qazaqstanda qurastyrylǵan
NUR-SULTAN. QazAqparat -«QazAvtoÓnerkásip» avtokólik salasyndaǵy kásiporyndar odaǵy 2019 jylǵy 4 aıda memorgandar men ulttyq kompanııalar tarapynan qyzmettik kólik satyp alý qarqyny boıynsha málimetti jarııalady. Osy oraıda memlekettik satyp alýlarda qazaqstandyq avtomobılderdiń úlesi 100 paıyzǵa jetti, dep habarlaıdy QazAqparat.
Atap aıtqanda, esepti kezeńde memlekettik organdar men ulttyq kompanııalar 9,6 mlrd teńgege 1 537 avtomobıl satyp alǵan. Bul ótken jylǵy kórsetkishten 46,5 paıyzǵa joǵary.
«Ótken jyly memleket qabyldaǵan sharalar kóptegen memorgandar men ulttyq kompanııalardaǵy satyp alýlar saıasatyn qaıta qarastyrýǵa yqpal etti. 2019 jylǵy qańtar-sáýirdiń qorytyndysy boıynsha alǵash ret memlekettik satyp alýlar tarıhynda alynatyn qyzmettik tehnıkanyń barlyǵy Qazaqstanda qurastyrylǵan avtomobılderge tıesili boldy», - delingen taratylǵan málimette.
Memlekettik mekemeler arasynda LADA brendiniń jeńil kólikteri suranysqa ıe boldy. Ótken kezeńde osy markadaǵy 555 tehnıka satyp alyndy. TOR-5 quramyna UAZ (325 kólik satyp alyndy), Skoda (230 kólik), Hyundai (170) jáne KIA (167) endi.
