Bıyl saryaǵashtyq dıqandar aǵyn sýdan tapshylyq kórmeıdi
SARYAǴASh. QazAqparat - Bıyl Saryaǵash aýdanynyń sharýalary aǵyn sýdan tapshylyq kórmeıtin bolady, dep habarlaıdy QazAqparat Túrkistan oblysy ákiminiń baspasóz qyzmetine silteme jasap.
Óıtkeni mundaǵy kanaldar kezeń-kezeńimen betondalyp jatyr. Solardyń biri – Jibek joly jáne Qablanbek aýyldyq okrýgterin kesip ótetin uzyndyǵy 18 shaqyrymdy quraıtyn «Qojahan» kanaly. 2019 jyly shilde aıynda bastalǵan, búginde qurylysy qyzý júrip jatqan jobanyń jalpy quny 1,55 mlrd teńgeni quraıdy. Menshik ıesi – «Saryaǵash aýdany sý sharýashylyǵy» memlekettik kommýnaldyq mekemesi. Qurylysqa jaýapty mekeme – «Gıdroqurylys» JShS. Nysannyń negizgi maqsaty – Saryaǵash aýdanyndaǵy 1300 gektar aýmaqty aǵyn sýmen qamtý.
«Bul jobanyń qurylysy bıylǵy jyldyń jeltoqsan aıynda tolyq aıaqtalady. Buǵan deıin kanaldyń sý ótkizý qabileti sekýndyna 5 tekshe metrdi qurasa, qurylysy bitkennen soń bul kólem edáýir arta túsetin bolady. Budan bólek, kanal betondalǵannan soń 1500 gektar egistik jerdi aǵyn sýmen qamtamasyz etip, sý únemdiligi 30 paıyzǵa jetedi»,- deıdi «Saryaǵash sý sharýashylyǵy» JShS dırektorynyń orynbasary Nurǵalı Aryzqulov.
Jalpy, Saryaǵash aýdany boıynsha 9 myń gektar sýarmaly jer bar. Bul kólem jyl sanap artyp keledi. Osy egistik alqaptardy aǵyn sýmen qamtyp otyrǵan irili-usaqty 20 kanal bar. Onyń eń kishisi sekýndyna 2 tekshe metr sý tasymaldaıdy.
