Bıyl saryaǵashtyq 585 otbasy baspanaly bolady - Túrkistan oblysy
TÚRKІSTAN. QazAqparat - Túrkistan oblysynyń Saryaǵash aýdanynda bes qabattan turatyn 45 páterli 13 turǵyn úıdiń qurylysy júrgizilýde, dep habarlaıdy QazAqparat.
Oblys ákimdiginiń baspasóz qyzmetinen málim etkendeı, qurylysy 2018 jyly bastalǵan turǵyn úıler bıyl paıdalanýǵa beriledi dep josparlanyp otyr. Bul jobalarǵa oblystyq bıýdjetten 5 mlrd teńgeden astam qarjy baǵyttalyp otyr. Kópqabatty turǵyn úıdi salý úshin Qaplanbek oqý tájirıbe sharýashylyǵy aýmaǵynan 120 gektarǵa jýyq jer telimi bólingen. Qurylys jumystary aıaqtalǵan soń 585 otbasy qonys toıyn toılaıtyn bolady.
Budan basqa, aýdandaǵy Qurkeles aýyldyq okrýginde 300 jáne 600 oryndyq eki mekteptiń qurylysy júrgizilýde. Sondaı-aq, Qaplanbek eldimekenindegi Jáýtikov atyndaǵy mektepke oqý korpýsy men sport zaly, ashana jáne sheberhanasy salynýda. Sonymen qatar, Jylǵa aýyldyq okrýginde Ǵ.Mustafın atyndaǵy 300 oryndyq mektep jáne Darbaza aýyldyq okrýginde mektepke qosymsha 150 oryndyq oqý korpýsy men jınalys zaly, sport zal, ashana jáne sheberhanalary boı kóterýde.
