Bıyl Saryaǵashqa 70 myńǵa jýyq týrıst kelgen

SARYAǴASh. QazAqparat – Túrkistan oblysy Saryaǵash aýdanyna aǵymdaǵy jyldyń toǵyz aıynda 70 myńǵa jýyq týrıst kelgen. Bul týraly Óńirlik kommýnıkatsııalar qyzmetinde ótken brıfıngte aýdan ákimi Muhıt Otarshıev málimdedi, dep habarlaıdy QazAqparat tilshisi.

Aýdan basshysynyń sózinshe, búginde 47 emdik saýyqtyrý jáne 1 balalar shıpajaıy, balalar saýyqtyrý lageri men golf klýby jáne 21 qonaq úı qyzmet kórsetedi. Sondaı-aq, bıyl týrızm salasyn damytý maqsatynda jalpy quny 450 mln teńge bolatyn 4 nysan iske qosylyp, 80 adam jumyspen qamtylǵan. Aýdannyń qurylys jáne ınfraqurylym salalarynda da atqarylǵan jumystar kóp.

«Bıyl aýdanda jalpy 4,3 mlrd teńgege 22 nysannyń qurylystary júrgizilýde. Onyń ishinde, aýyz sýmen qamtý boıynsha 2 nysan, turǵyn úı qurylysy boıynsha 2 nysan paıdalanýǵa berildi. Jyl sońyna deıin 8 nysannyń qurylys jumystary aıaqtalyp, qalǵan 10 nysan kelesi jylǵa ótpeli bolady. Halyqty tabıǵı gazben qamtý úlesi jóninde aıta ketsem, ótken jyly 50,7 paıyz bolsa, bıyl kórsetkishti 69 paıyzǵa jetkizýdi josparlap otyrmyz. Al, aýyz sýmen qamtý búgingi tańǵa 50,7 paıyz bolsa, ústimizdegi jyldyń sońyna deıin 56,3 paıyzǵa jetkizemiz dep otyrmyz. Sapaly elektr energııasymen aýdan halqynyń 98,5 paıyzy qamtylǵan», – dedi aýdan ákimi.

Jalpy aýdanda bıyl respýblıkalyq jáne jergilikti bıýdjet esebinen jalpy 55,2 shaqyrymdy quraıtyn 34 kósheni ortasha jóndeý jumystary júrgizilgen. Jańa kópir salynyp, bul jumystarǵa 1 591,7 mln teńge qarjy qaralǵan. Bul jumystar aǵymdaǵy jyldyń qarasha aıynda tolyǵymen aıaqtalady dep josparlanyp otyr.