Bıyl «Samuryq-Qazyna» toby ardagerlerge 600 mln. teńgege kómek kórsetti
Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngke atalǵan qordyń Jurtshylyqpen baılanys jónindegi bas dırektory Darhan Qaletaev málim etti.
«2014 jyly «Samuryq-Qazyna» AQ kompanııalar toby UOS ardagerlerin qoldaýǵa 130 mln. teńge qarjy bóldi. Bıyl biz bul kómekti eselep arttyrdyq jáne onyń kólemi 600 mln. teńgege jetti. Osy qarjy esebinen ardagerlerge tıisti kómek kórsetilip, júıeli negizde keshendi qoldaý jasaldy», - dedi D. Qaletaev.
Belgili bolǵandaı, sharalar jospary úkimettik baǵdarlamalardy qaıtalamaıdy. Sonymen qatar, bul jospar Qazaqstannyń «Ardagerler uıymy» ortalyq keńesimen kelisilgen. Qarjynyń negizgi bóligi ardagerlerge materıaldyq kómek kórsetýge jumsaldy. «Jeńis» jobasy boıynsha birneshe jobalar iske asyrylyp, onyń aıasynda qart maıdangerlerge «dabyl qurylǵylary» taratyldy. Budan buryn habarlanǵandaı, úıde jalǵyz qalǵan, qaraýshysy joq ardagerler qıyn jaǵdaıǵa túsken kezde atalǵan dabyldyń túımesin bassa, ortalyq dıspetcherlik pýnktke habar túsedi. Sol kezde bul ardager týraly tolyq aqparat shyǵarylyp, qarttarǵa dereý jedel-járdem mashınasy nemese basqa da kómek túrleri barady.
D.Qaletaevtyń sózine qaraǵanda, úsh aıdyń ishinde ardagerlerge 4 myńnan astam dabyl túımesi bar telefondar úlestirildi. Búginde maıdangerlerden bul qurylǵy arqyly 500-den astam shaqyrtý kelip túsken eken.
