Bıyl «Samuryq-Qazyna» qoryna qarasty kompanııalardaǵy qazaqstandyq qamtý 72 paıyzǵa boljanyp otyr
Bul týraly QazAqparat Qordyń baspasóz qyzmetine silteme jasap habarlaıdy.
Baspasóz qyzmetiniń málimetine qaraǵanda, byltyrǵy 2009 jyly Qor torabyndaǵy kompanııalardyń jalpy qazaqstandyq qamtý 74 paıyzdy qurady. Kompanııalarmen kelisimder boıynsha taýarlardy satyp alýda 580,3 mlrd. teńge jumsalsa, bundaǵy qazaqstandyq qamtý 63 paıyzdy, jumystar atqarýda 450,5 mlrd. teńgeniń kelisimi boıynsha qazaqstandyq qamtý 64 paıyzdy, qyzmet túrlerin kórsetýdegi kelisim 504,3 mlrd. teńgeni qurap, ondaǵy qazaqstandyq qamtý 94 paıyzǵa teń bolǵan.
Al 2010 jylǵy satyp alý jospary 2 trln. 595 mlrd. teńge shamasynda boljanady. Ondaǵy qazaqstandyq qamtý 72 paıyzǵa jetedi dep kútilýde. Bul rette, Qor men otandyq keıbir iri taýar óndirýshileriniń arasynda uzaq merzimdik kelisimshart jasalynady degen josparlar bar.
