Bıyl Samara - Shymkent tasjolynda 11 sheteldik qaza tapqan
AQTÓBE. QazAqparat - Jyl basynan beri óńirde 69 jol-kólik oqıǵasy tirkelse, Samara-Shymkent tasjolynda 11 sheteldik kóz jumdy, dep habarlaıdy QazAqparat tilshisi.
Aqtóbe oblystyq polıtsııa departamenti alys jolǵa shyǵyp, júk jáne jolaýshy tasymaldaıtyndar úshin eń qaýipti joldy atady. Samara-Shymkent tasjolynda tek sheteldikter mert bolyp jatyr. Sebebi jolǵa shyqqandar tynyqpaıdy, jyldamdyqty asyrady.
«Kólik quralyn basqaratyndar uıyqtap ketip jatyr. Búgin biz olardy toqtatyp, qaýipti jerlerdi belgilep, túsindirý jumystaryn júrgizdik. Jyl basynan beri 11 adam tasjolda qaıtys boldy. Olardyń bári shetel azamattary», - dedi oblystyq PD bastyǵynyń birinshi orynbasary Abzal Shotanov.
Aıta keteıik, jyl basynan beri respýblıkalyq mańyzy bar joldarda 69 jol-kólik oqıǵasy tirkelgen. Jol apaty kezinde 26 adam qaza bolyp, 120 adam jaraqat alǵan. Al Samara-Shymkent trassasynda 39 jol-kólik oqıǵasy tirkelip, 11 adam mert boldy jáne 66 adam jaraqattandy. Júrgizýshilerdiń kóbi uıyqtap ketedi nemese qarsy baǵytqa shyǵady.
«Aqtóbe oblysynyń aýmaǵynda «Qaýipsiz jol» jedel-profılaktıkalyq sharasy aıasynda «Jolda qabyldaý» aktsııasy ótti. Shetel azamattaryn PD bastyǵynyń orynbasary Abzal Shotanov jáne Ákimshilik polıtsııa basqarmasy, Jergilikti polıtsııa qyzmeti basqarmasy, «QazAvtoJol» qyzmetkerleri qabyldady. Medıtsına qyzmetkerleri júrgizýshilerdiń densaýlyǵan tekserdi. Alys jolǵa shyqqan sheteldikterdi jol sapasy, jol belgilerin ornatý suraqtary mazalaıdy eken. Al polıtsııa qyzmetkerleri júrgizýshiler úshin eń qaýipti aýmaqtardy kartadan kórsetilip, demalys oryndary týraly aqparat berdi», - dep habarlady oblystyq PD baspasóz qyzmetiniń jetekshisi Erbolat Sarqulov.
Aıta keteıik, qabyldaý kezinde dastarqan jaıylyp, sheteldik jolaýshylarǵa baýyrsaq pen kóje usynyldy.
