Bıyl respýblıkada úlken kólemde kóktemgi sý tasqyny oqıǵalary bolmaıdy - Qazgıdromet
ASTANA. 16 naýryz. QazAqparat /Jasulan Amanbaıuly/ - Bıyl respýblıkada byltyr bolǵan keń kólemdi kóktemgi sý tasqyny oqıǵalary bolmaıdy.
Bul týraly búgin Astanada ótken brıfıng barysynda «Qazgıdromet» RMK Gıdromet ortalyǵynyń dırektory Baıan Sazanova málim etti.
Onyń aıtýynsha, eldegi ózenderdegi jáne arnalaryndaǵy sýdyń mólsheri ortasha deńgeıden tómen. Eger qar jyldam erip, tasqyn sýlar ózen arnalaryna quıylsa, olardyń deńgeıi aýqymdy sý tasıtyndaı kólemge ulasa almaıdy.
«Byltyrǵy jyly kóktemgi sý tasqyndary ózen-sýlardaǵy sý kóleminiń tym kóptiginen oryn alǵan bolatyn. Bıyl, árıne, sý tasý oqıǵalary tirkelýi múmkin, alaıda ótkendegideı aýqymdy sý tasýlary bolmaıdy dep boljaýdamyz. Óıtkeni bıyl qar byltyrǵy jylǵa qaraǵanda az tústi»,-dep atap kórsetti B. Sazanova.
«Biz kúndelikti taldaýlar jasaýdamyz. Aýa raıynyń qolaısyzdyqtary týraly halyqqa der kezinde habarlap otyramyz»,-dedi ol sóz sońynda.
