Bıyl Ramazan aıy 28 maýsymnan bastalady - QMDB
ASTANA. QazAqparat - Qazaqstan musylmandary dinı basqarmasynyń Tóralqa májilisinde 2014 jyldyń 28 maýsymy - qasıetti Ramazan aıynyń birinshi kúni bolyp bekitildi.
Búgin Bas múftı Erjan qajy Malǵajyulynyń tóraǵalyǵymen ótip jatqan Tóralqada Ramazan aıyna daıyndyq jumystary pysyqtaldy. Bas múftı saýaby eselenip beriletin qasıetti aıda qaıyrymdylyq aktsııalaryn kóbirek uıymdastyrýdy ókil ımamdardyń qaperine saldy.
Elimizdegi meshitter men medreselerde Ramazan aıy joǵary deńgeıde ótkizilmek. Qoǵamdyq kólikterge, qoǵamdyq oryndarǵa, saýda úılerine banner men bılbordtar ilinbek. Sonymen qatar, qasıetti Qadir túni keshinde arnaıy ǵıbratty sharalar uıymdastyrý josparlandy. Qalalyq avtobýstarda qasıetti aıdyń qurmetine tegin júrý aktsııalaryn júzege asyrý kózdelýde.
«Yntymaǵy ydyrap, birliginen bereke ketken eldiń bolashaǵy da bulyńǵyr bolmaq. Qanshama jurttyń jer betinen joǵalyp, tegi men tutastyǵynan aıyrylýynyń negizgi sebebi - baýyrmaldyqtyń bolmaýy. Qudaıǵa shúkir, elimizdegi ulttar men ulystardyń bir shańyraq astynda tatý ómir súrýi - Allanyń bergen syıy men nyǵmeti. Sondyqtan biz osynaý ıgilikterdi ýaǵyzdarymyzda kóbirek aıtýymyz kerek. Ramazan - musylmandardyń aýyzbirshiligin arttyratyn, ózara baýyrmashyldyǵyn nyǵaıtatyn qasıetti aı. Múbárak aıdy joǵary deńgeıde ótkizýge bárimiz atsalysýymyz qajet», - dedi Erjan qajy Malǵajyuly.
