Bıyl Prezıdenttiń qatysýymen 463 shara ótti
«El jylnamasyndaǵy bıylǵy jyl úlken iri oqıǵalarmen este qaldy. Bul eń aldymen egemen elimizdiń qalyptasyp, damýyna zor eńbek sińirgen QR Tuńǵysh Prezıdenti - Elbasy Nursultan Nazarbaevtyń el basqarý tizginin Qasym-Jomart Toqaevqa tapsyrǵan sátinen bastaý alady. Osydan keıingi elimizdiń saıası ómirindegi mańyzy zor oqıǵa Prezıdent saılaýy boldy. Bıliktiń basty saılaý naýqany Ata zańymyzǵa sáıkes júzege asty. Qasym-Jomart Kemeluly halyq aldynda ant bergennen keıin Memleket basshysy retinde birden bilek sybana kirisip ketti», - dedi ol.
Onyń atap ótýinshe, Memleket basshysy elimizdiń búkil óńirin aralap, halqymyzdyń áleýmettik-ekonomıkalyq ahýalymen tanysqan. Sonymen qatar basqa da kóptegen mańyzdy bastamalar qolǵa alynyp, aýqymdy is-sharalar atqaryldy.
«Jalpy, Memleket basshysynyń naýryz aıynan bergi atqarǵan jumysy halyqtyń kóz aldynda. Prezıdent kóptegen halyqaralyq kezdesýler ótkizdi. Óńirlerdi aralady. Shetelderge resmı, memlekettik saparlarmen baryp qaıtty jáne birqatar halyqaralyq jıyndarǵa qatysý úshin shetelderde jumys saparymen boldy. Mańyzdy kelisimder júrgizdi», - dedi Berik Ýálı.
Sonymen qatar ol QR Prezıdentiniń el ishinde atqarǵan jumysyna toqtaldy.
«El ishindegi atqarǵan sharýalaryna toqtalar bolsaq, Memleket basshysynyń qatysýymen 463 shara ótti. Qasym-Jomart Kemeluly elimizdiń aımaqtaryna 25 ret jumys saparymen bardy. Keıbir oblystarǵa tipti eki ret barǵanyn bilesizder. Qasym-Joart Kemeluly QR Prezıdenti qyzmetine kirisken sátten beri 239 memlekettik organnyń basshylaryn, Parlament depýtattaryn, saıası partııalar men qaýymdastyq ókilderin jáne jeke tulǵalardy qabyldady. Sonymen qatar Memleket basshysy 31 eldiń basshysymen telefon arqyly sóılesti», - dedi QR Prezıdentiniń baspasóz hatshysy.