Bıyl polıtseıler jasaǵan sybaılas jemqorlyq qylmystar 20 paıyzǵa tómendedi - ІІM
ASTANA. 29 maýsym. QazAqparat /Jasulan Amanbaıuly/ - Bıyl polıtseıler jasaǵan sybaılas jemqorlyq qylmystar sany 20 paıyzǵa tómendedi. Bul týraly búgin ІІM-de ótken brıfıng barysynda Ózindik qaýipsizdik departamenti bastyǵynyń mindetin atqarýshy Qýat Ospanov málim etti.
Onyń aıtýynsha, sońǵy 5 aıdyń ishinde polıtseılerge qatysty 38 sybaılas jemqorlyq sıpattaǵy qylmystyq is qozǵaldy. Óz mindetterine salǵyrttyq tanytqan 9 myńǵa tarta polıtseı tártiptik jaýapkershilikke tartylǵan.
«Aǵymdaǵy jyldyń tek 5 aıynda ǵana ІІM ózindik qaýipsizdik bólinisteri azamattardyń 7 myńǵa jýyq shaǵymy men aryzyn qarap, olar boıynsha 3 myńnan astam tergeýge deıingi tekseris jáne bir jarym myńǵa jýyq qyzmettik tergeý júrgizdi. Myńǵa jýyq jedel-aldyn alý is-sharasy uıymdastyrylyp, materıaldar boıynsha 134 qylmystyq is, onyń ishinde 38 sybaılas jemqorlyq sıpattaǵy qylmystyq is qozǵaldy, 500-den astam esepke alý tártibin buzýshylyq anyqtaldy», - deıdi ol.
Bul kórsetkish ótken jylmen salystyrǵanda shamamen 20 paıyzǵa kem.
