Bıyl pitir sadaqany onlaın rejımde berýge bolady – QMDB
«Elimizdegi tótenshe jaǵdaıǵa baılanysty Ramazan aıynda beriletin pitir sadaqa men zeketti mobıldi qosymshalar arqyly aýdarýǵa bolady. Biz onlaın júıede sadaqa berýdiń ońtaıly jolyn tańdadyq. Musylman qaýymy saýaptar eselenip jazylatyn qasıetti aıda muqtaj otbasylarǵa zeket pen sadaqa berip, halyqtyń batasyn alyp, alǵysqa bólenedi», - deıdi QMBD tóraǵasynyń orynbasary, naıb múftı Ershat Ońǵarov.
Ol bıyl Ramazan aıy 24 sáýirde bastalatynyn aıtty.
«Osy rette Ramazan aıynda beriletin pitir sadaqa men zeketti Kaspıı bank, Halyq banki jáne Kivi mobıldi qosymshalary arqyly aýdarýǵa bolady. Qazirgi tańda basqa da banktermen kelissózder júrgizilip jatyr. QMDB belgili bir bankti jarnamalamaıdy, alaıda tótenshe jaǵdaıda úıden shyqpaı sadaqa berýdiń osyndaı jolyn tańdap otyrmyz. Mobıldi qosymshalarǵa ár oblys pen respýblıkalyq mańyzy bar qalalardaǵy ortalyq meshittiń esepshottary engizildi. Ár azamat óz óńirindegi meshittiń esepshotyna pitir sadaqasy men zeketin úıden shyqpaı onlaın rejımde aýdara alady. QMDB-nyń tóralqa sheshimi boıynsha, bıyl bir adam atynan beriletin pitir sadaqa mólsheri - 370 teńge dep bekitildi. Pitir sadaqa quny eki keli unnyń respýblıka boıynsha eseptegende naryqtyq ortasha baǵasymen shyǵaryldy. Materıaldyq jaǵdaıy bar azamattar pitir sadaqany meıiz nemese qurma qunymen de berse bolady», - deıdi ol.
