Bıyl Petropavldy abattandyrýǵa 1,5 mlrd teńge jumsaldy
PETROPAVL. QazAqparat – Bıyl Petropavl qalasyn abattandyrýǵa 1,5 mlrd teńge jumsaldy, dep habarlaıdy QazAqparat tilshisi.
Soltústik Qazaqstan oblysy ákimi baspasóz qyzmetiniń málimetinshe, sońǵy úsh jylda Petropavldy kórkeıtýge 4,4 mlrd teńge jumsalǵan. Abattandyrýǵa bólinetin qarjynyń kólemi jyldan-jylǵa ulǵaıyp keledi. Máselen, bıyl oblys ortalyǵyna 2014 jylmen salystyrǵanda 6 ese kóp qarjy jumsaldy, ıaǵnı 246 mln-nan 1,5 mlrd teńgege deıin ósti. Qala bıýdjeti de 2017 jyldan beri shamamen eki esege artyp 65 mlrd teńgege jetti.
«Bıýdjettiń kóbeıýi bizge aýqymdy jumystardy atqarýǵa múmkindik beredi. Qaladaǵy oń ózgeristerdi ár turǵyn baıqady desem, artyq aıtpaımyn. Aýlalar jónge keltirildi. Jaıaý júrginshiler joly istelip, tegin avtoturaqtar paıda boldy. Balalar jáne sport alańdary salyndy. Qazir oblys ortalyǵyndaǵy aýlalardyń 80 % asfalttalǵan. Ár ekinshi aýlada balalardyń oıyn alańy bar. 31 kóshege zamanaýı jaryq ornatyldy», - deıdi SQO ákimi Qumar Aqsaqalov.
Óńir basshysy Petropavldaǵy atqarylyp jatqan jumystardyń sapasyn ózi baryp kórip, baqylaıdy. Bul joly vokzal mańyndaǵy jańarǵan alańda boldy.
Bul alań búginde tanymastaı ózgergen. Sýburqaq iske qosylyp, ádemi kóshe shamdary qoıyldy. 4 myń sharshy metrge gazon tóselip, eski pavılondar alyndy. Endi Petropavl qonaqtary bul jerden óz qalasynyń aty bar oryndyqty taba alady.
«Petropavlda 2 ortalyq park bar. Bul - Petropavl úshin jetkiliksiz. Bıyl Petropavlda 5 jańa saıabaq paıda bolady. Olardyń ekeýi ashyldy. Qalanyń ár aýdanynda salynyp jatyr. Máselen Bereke yqsham aýdanynda salynyp jatqan saıabaqtyń ornynda buryn batpaq, qoqys bolǵan. Qarasha aıynda jumystar aıaqtalady. Turǵyndar sýburqaqty tamashalap, gúlge bólengen baqta dem alady. Amfıteatr, demalys aımaǵy, balalardyń oıyn jáne sport alańy, júgirý joly men alpınarıı bolady», - deıdi Qumar Aqsaqalov.
Petropavldaǵy Dınamo stadıony da kúrdeli jóndelip jatyr. Turǵyndarǵa, sonyń ishinde jastarǵa arnalǵan sport ternajerleri paıda bolmaq.
«Keler jylǵa da aýqymdy josparymyz bar. Brýsılovskıı kóshesinegi saıabaqtyń qurylysy jalǵasady. Jýkov kóshesinde sport ternajerleri bar alań ashamyz. Meşan ormanynda shaǵyn stadıony bar sport alańyn paıdalanýǵa beremiz. Qýyrshaq teatrynyń janyndaǵy eski úılerdi syryp, onyń ornynda da bir saıabaq paıda bolady. Kelesi jylǵa úlken jobamyzdyń biri – Sport saraıynyń qurylysy, № 8 mektep janynan salynady. Onyń da qasynan turǵyndarǵa demalys ornyn ashamyz», - deıdi óńir basshysy Qumar Aqsaqalov.
Buǵan deıin Petropavlda temirjol vokzalynyń kúrdeli jóndelip jatqanyn aıtqan edik.
