Bıyl Petropavlda úsh aýysymmen oqý problemasy túbegeıli sheshiledi
PETROPAVL. QazAqparat - Bıyl Petropavl mektepterinde úsh aýysymmen oqý túıitkili sheshiledi, dep habarlaıdy QazAqparat tilshisi.
Qazir oblys ortalyǵynda 40-qa jýyq mektep bolsa, sonyń úsheýinde balalar úsh aýysymmen oqıdy. Bıyl bul másele sheshimin tappaq. Shaharda 1500 balaǵa arnalǵan eki bilim ordasy jańa oqý jylyna deıin tapsyrylmaq. Ekeýi de qazaq mektebi. «Jasórken» aýdanynda 900 oryndyq bolsa, ekinshisi - 600 oryndyq mektep «Bereke» yqsham aýdanynda ashylady.
«Sońǵy 12 jyl boıy oblysta mektep salynbaǵan. Bıyl eki qazaq mektebi paıdalanýǵa beriledi. Taǵy bireýiniń jaqynda qurylysy bastalady. Nysanǵa jer bólindi, qazir qujattary ázirlenip jatyr», - deıdi SQO bilim basqarmasynyń jetekshisi Gúlmıra Kárimova.
Jalpy oblysta qazir 5 mektepte balalar úsh aýysym boıynsha sabaq oqýda. Taıynsha jáne Beskól eldi mekenderinde bilim ordasyna qajettilik bar. Bıyl 3 myńnan astam túlek mektep bitirse, 1 qyrkúıek kúni 9 myńǵa jýyq búldirshin mektep tabaldyryǵyn alǵash attaıdy. Mamandardyń aıtýynsha, sońǵy 2-3 jylda oblysta 1-synypqa baratyn balalardyń sany úsh ese artyp otyr.
