Bıyl Petropavlda 40-qa jýyq kópqabatty turǵyn úı paıdalanýǵa beriledi
PETROPAVL. QazAqparat – Petropavlda bıyl 210 myń sharshy metr baspana salynyp, paıdalanýǵa beriledi. Sonyń jartysynan astamy – bıýdjettik úı, dep habarlaıdy QazAqparat tilshisi.
Petropavl qalalyq ákimdiginiń málimetinshe, jyl sońyna deıin jalpy aýmaǵy 33,6 myń sharshy metr bolatyn 10 kommertsııalyq úıdiń qurylysy aıaqtalady. Sondaı-aq 113,8 myń sharshy metrdi alatyn jáne 1533 páteri bar 22 bıýdjettik baspana paıdalanýǵa beriledi. Onyń qataryna taǵy 32,6 myń sharshy metrlik 4 baspana qosylmaq.
Jeke turǵyn úı qurylysy boıynsha bıyl 30 myń sharshy metrdi salý josparda bar. Bul maqsatqa bir jylǵa 27,9 mlrd teńge jumsalmaq.
«Nurly jer» memlekettik baǵdarlamasyn júzege asyrý bıyl úsh baǵyt boıynsha júrgiziledi.
Satyp alý múmkindiginsiz beriletin áleýmettik jalǵa beriletin baspana. Petropavlda bıyl osyndaı 556 páter halyqtyń áleýmettik turǵydan osal toptaryna paıdalanýǵa beriledi. 128 páterlik eki úı Sennaıa kóshesinde jáne 100 páterlik úsh úı Bereke yqsham aýdanynda salynyp jatyr.
Áleýmettik nesıelik baspanalar Jambyl kóshesinde salynyp jatyr. 108 páterlik eki úıde bir sharshy metrdiń quny - 160 myń teńge. Olardyń bireýinen 1 mamyrǵa deıin 95 páter satyldy. 29 naýryzdan bastap «Otbasy bank» AQ ekinshi úıden páterlerdi úlestire bastady. Salynyp jatqan 108 páterlik úshinshi úı de «Shańyraq» baǵdarlamasy boıynsha satylady. Osylaısha qalalyq ákimdikte páterge kezekte turǵan 324 adam baspanaly bolmaq.
Úshinshi baǵyty – jeke turǵyn úı qurylysy. Qazirgi ýaqytta Solnechnyı-2 shaǵyn aýdanynda salynyp jatyr. 1 mamyrǵa deıin satyp alýshylar І úlgidegi 72 úıdiń barlyǵyn brondady. Bıyl ІІ úlgidegi 13 úıdiń de qurylysy aıaqtalmaqshy. Olar salynyp bolǵannan keıin ǵana satylymǵa shyǵarylady.
