Bıyl Petropavl kóshelerine 4 myńǵa jýyq kóshet otyrǵyzylmaq
PETROPAVL. QazAqparat – Petropavl kóshelerindegi eski aǵashtar kesilip, ornyna qalaǵa kórik beretin jasyl jelek otyrǵyzylmaq, dep habarlaıdy QazAqparat tilshisi.
Petropavldaǵy botanıkalyq baqtyń mamandary qalalyq ákimdiktiń tapsyrysy boıynsha eki kóshe boıyndaǵy jasyl jelektiń jaǵdaıyn zerttedi. Búginde shamamen ár tórtinshi aǵash aýystyrýdy qajet etedi. Olardyń biri – shirigen, endi biri aýrýǵa shaldyǵyp, qurt jeı bastaǵan.
«Rıjskaıa kóshesinen M.Jumabaev kóshesine deıin 198 aǵashty eseptedik. Onyń 49 aýystyrý kerek. Bul aǵashtardan keletin qaýip joǵary. Qatty daýylda qulaýy múmkin. Olardy kesip alý kerek. Ornyna jóke, terek, tal, shaǵan, alma men almurt, sheten men dolana egýdi usyndyq. Bul aǵashtardan qorshaǵan ortaǵa keler paıda kóp. Aýany tazartyp qana qoımaı, qalaǵa kórik beredi», - deıdi Petropavldaǵy botanıkalyq baqtyń dırektory Artýr Rıazapov.
Petropavldaǵy aǵashtardyń basym bóligi jarty ǵasyr buryn otyrǵyzylǵan eken. Endi olar birtindep aýystyrylmaq.
«Bıyl oblys ortalyǵynyń 17 kóshesine aǵashtar otyrǵyzý josparlanǵan. 4 myńǵa jýyq kóshet egilmek. Bul jumystar mamyr aıynyń basynda qolǵa alynady. ıA.Gashek, N.Nazarbaev, Abaı jáne taǵy da basqa negizgi kóshelerge qaıyń, terek, tal, badam, alma sekildi aǵash kóshetteri otyrǵyzylady», - deıdi Petropavl qalalyq turǵyn úı-kommýnaldyq sharýashylyǵy jáne jolaýshylar kóligi, avtomobıl joldary bóliminiń baspasóz hatshysy Ásem Aıtolla.
