Bıyl Pavlodar oblysynyń eldi mekenderine 98 ákim saılanady
ASTANA. QazAqparat - Aǵymdaǵy jyly Pavlodar oblysyna qarasty aýyldar men okrýgterde 98 ákim saılanatyn bolady.
Bul týraly búgin «2017 jylǵy tamyz aıyna bekitilgen aýyldyq okrýgtiń quramyna kirmeıtin aýyldyq okrýgter men aýyldardyń ákimderin saılaý» týraly ótken baspasóz jıynynda Pavlodar oblystyq saılaý komıssııasy tóraǵasynyń orynbasary Vera Erashova málim etti, dep habarlaıdy pavlodarnews.kz .
"Saılaý Pavlodar oblysynyń 98 aýylynda jáne okrýgterinde 2017 jylǵy 16 jáne 17 tamyzda ótkiziledi, - deıdi Vera Erashova.
pavSaılaý komıssııasy tóraǵasy orynbasarynyń aıtýynsha, aýmaqtyq saılaý komıssııalarynyń kúntizbelik josparlaryna sáıkes, ákimdikke kandıdattardy usyný 22 jáne 23-shildede aıaqtalyp, barlyǵy 297 kandıdat usynyldy. Olardyń qoıylǵan barlyq talaptarǵa sáıkestigi naqtylanǵannan keıin, aýmaqtyq saılaý komıssııalary 294 kandıdatty tirkedi. Sebebi, úsh kandıdat bergen ótinishterin qaıtaryp alǵan. Jalpy, 110-ǵa jýyq saılanýshy - áıel adamdar. Bir bos orynǵa eń kemi eki úmitkerden bolý kerek. Ár aýdan men qalada saılanatyn aýyldyq ákimder sany ártúrli. Máselen, Pavlodar qalasyna qarasty eki aýylda ǵana ákim saılansa, Kachır aýdanyndaǵy aýyldarda - 11 jańa basshy. Qazirgi kezde salyq organdary kandıdattardyń jáne olardyń jubaılarynyń kiris týraly málimetteriniń durystyǵyn anyqtaýda. Úgit jumystary 2 jáne 3 tamyzda bastalyp, saılaý aldyndaǵy kúnniń 00:00 saǵatynda (14 jáne 15 tamyzda) aıaqtalady.
