Bıyl Pavlodar oblysynda ana ólimi tirkelmegen
ASTANA. QazAqparat - Pavlodar oblysynda 2018 jyldyń alty aıy ishinde bir de bir ana ólimi tirkelmegen, dep habarlaıdy pavlodarnews.kz.
Bul týraly óńirlik kommýnıkatsııalar qyzmetinde «Densaýlyq» memlekettik baǵdarlamasyn júzege asyrý» taqyrybynda ótken baspasóz máslıhatynda óńirlik densaýlyq saqtaý basqarmasynyń basshysy Oraz Muqashev aıtty.
«2016-2019 jyldar aralyǵynda elimizde júzege asyrylatyn «Densaýlyq» baǵdarlamasy aıasynda 36 ındıkator belgilengen. Osyǵan sáıkes aımaqtaǵy densaýlyq saqtaý salasynyń qyzmeti aıqyndalady. Jarty jyldyń ishinde atalmysh baǵdarlamanyń barlyq kórsetkishiniń 95 paıyzy oryndalǵan. Mundaǵy basty ındıkatordyń biri ana ólimin tómendetý bolyp tabylady», -- deıdi Oraz Muqashev.
Spıkerdiń aıtýynsha, byltyr maqsatty kórsetkish 11,2-ni quraǵan. ıAǵnı, ótken jylǵy osyndaı kezeńde ana ólimi boıynsha 16.5 paıyz kórsetkishpen tıisti ındıkatorǵa qol jetkizilmegen bolsa, aǵymdaǵy jyly ana ólimi oryn almaǵan. Bul baǵytta barlyq emhanalarmen jáne medıtsınalyq uıymdarmen birge aýqymdy jumys júrgizilip, «Jol kartasy» men keshendi sharalar jospary engizilgen. Budan basqa, óńirdiń bas dárigeri sábı ólimi boıynsha da kórsetkish azaıǵanyn atap ótti.
«Byltyrǵy jyly ındıkator 8,8 promıllege teń bolsa, bıyl 5,7-ge azaıdy. Memlekettik baǵdarlamanyń maqsatty kórsetkishi - 7,2 promılle. 2017 jyly 53 jáne bıyl 33 búldirshin shetinep ketken. Onyń ishinde kóptegen jaǵdaıda balalardyń merzimnen buryn jáne tómen salmaqpen dúnıege kelýi sebep bolǵan», - deıdi ol.
