Bıyl Pavlodar oblysynda 52 myń adamnyń jalaqysy 30 paıyzǵa artady
«Nur Otan» partııasynyń oblystyq fılıalynda partııanyń XVIII sezi qorytyndylary boıynsha oblys aktıviniń otyrysy ótti. Partııa oblystyq fılıalynyń tóraǵasy, oblys ákimi Bolat Baqaýov atap ótkendeı, Memleket basshysy eldiń ekonomıkalyq ósimin halyqtyń ál-aýqatynyń arttyrýǵa baǵyttaýdy tapsyrdy.
«Búgin aýqymdy áleýmettik ınvestıtsııalar zamany, - deıdi Bolat Baqaýov. - Osy maqsatqa Ulttyq qor men respýblıkalyq bıýdjetten eki trıllıon teńgeden astam qarajat bólinedi. Bul soma áleýmettik bastamalardyń úsh úlken tobyn júzege asyrýǵa baǵyttalmaq».
Bolat Baqaýov atap ótkendeı, 1 shildeden bastap 52 myń pavlodarlyqtyń jalaqysy 30 paıyzǵa deıin ósiriledi. Olardyń barlyǵy bıýdjettik salada tómen jalaqyly pozıtsııalarda eńbek etedi. Osy baǵytqa bıyl alty mıllıard teńge, al kelesi jyly 12 mıllıarda teńge bólinedi. Sonymen birge, 2,5 myń tómengi sanattaǵy memlekettik qyzmetshilerdiń jalaqysy orta eseppen 25 paıyzǵa artady.
«Memleket basshysy az qamtylǵan jáne kópbalaly otbasylardy qoldaýǵa erekshe kóńil bólgen, - deıdi Bolat Baqaýov. - Oblys boıynsha 348 otbasy ataýly áleýmettik kómek alýda. Endigi ýaqytta atalǵan kómek berýdiń kólemi ǵana emes, olardy taǵaıyndaýdyń protsedýralary ońtaılandyrylmaq».
Prezıdenttiń usynǵan áleýmettik bastamalaryn júzege asyrý aıasynda turǵyndardy baspanamen qamtý jáne bilim berý men densaýlyq saqtaý salalaryn damytý qolǵa alynbaq. Sonymen qatar, oblys turǵyndarynyń ómir súrý sapasyn arttyrýǵa baǵyttalǵan óńirlik saıasat júzege asyrylady. Osy oraıda, «Nur Otan» partııasyna qoǵamdyq qabyldaý bólmeleriniń jumystaryn kúsheıtip, sol arqyly turǵyndarmen keri baılanystyń kúshti tetigine aınalý mindettelýde.
Óńirlik partııa uıymy tóraǵasynyń birinshi orynbasary Nıkolaı Dychkonyń aıtýynsha, 2019 jyldyń 18 aqpanynan bastap partııa qoǵamdyq qabyldaý bólmelerine 400-den astam turǵyn ótinish bildirgen. Olardyń úshten biri oń sheshimin tapty.
«Negizinen, olar ataýly áleýmettik kómek, turǵylyqty tirkeý, mektepterdegi tegin tamaqtaný, qoǵamdyq kóliktegi jolaqysy jáne taǵy da basqa máselelerge qatysty, - dep aıtty Nıkolaı Dychko. - Kún saıyn partııa fılıaldaryna 40-qa jýyq adam kómekke júginedi. Alaıda, Prezıdent aıtqandaı, shynymen de kómekke zárý adamdarǵa ǵana kómek beriledi».
Nıkolaı Dychkonyń sózinshe, partııa qoǵamdyq qabyldaý bólmeleriniń jumysy kúsheıtiledi. Sonymen qatar, partııa turǵyndardyń máselelerin sheshýge baǵyttalǵan «Halyqqa kómek» arnaıy jobasyn iske qosady.