Bıyl Pavlodar oblysynda 21 zańsyz qoqys orny joıyldy
NUR-SULTAN. QazAqparat - Oblystyq ekologııa departamenti «Qazaqstan ǵarysh sapary ulttyq kompanııasy» AQ-men birlesip, zańsyz qoqys oryndaryn joıý maqsatynda ǵaryshtan baqylaý júrgizý jumystarynyń nátıjesin jarııalady, dep habarlaıdy pavlodarnews.kz.
Pavlodar oblysy boıynsha bas memlekettik ekologııalyq ınspektor Darhan Isjanovtyń málimdeýinshe, jergilikti ákimdikterge zańsyz qoqys oryndaryn joıýǵa nusqaýlyqtar berilgen. Nátıjesinde aýdan ákimdikterimen 21 qoqys orny joıylǵan.
Onyń ishinde Pavlodar aýdanynda - 12 nysan, Aqsý qalasynda – 5 jáne Pavlodar qalasynda 4 nysan bar.
«Qazaqstan ǵarysh sapary ulttyq kompanııasy» AQ geoportalynyń málimetterine súıensek, 2019 jyly Pavlodar oblysynda 677 zańsyz qoqys orny anyqtalǵan. Olardyń kóbi aýyldyq óńirlerde ornalasqan. Mysaly, Pavlodar aýdanynda - 277, Aqsý qalasynyń aýyldyq aımaǵynda – 167, Pavlodar qalasynda – 136, Ýspen aýdanynda – 10, Sharbaqty aýdanynda – 36, Aqqýly aýdanynda – 16, Aqtoǵaı aýdanynda – 27 jáne Tereńkól aýdanynda – 9 oryn anyqtalǵan», - deıdi Pavlodar oblysy boıynsha bas memlekettik ekologııalyq ınspektor Darhan Isjanov.
Inspektordyń aıtýynsha, qaldyqtardyń eshbir baqylaýsyz ornalastyrylýy nátıjesinde polıgonda úı janýarlarynyń ólekseleri, aralas kúıde kúl, shyny, qoldanystan shyqqan turmystyq quraldar, polıetılen paketter jáne turmystyq qaldyqtardyń basqa da túrleri kezdesedi. Oryn alǵan buzýshylyqtar úshin aýyldyq okrýg ákimine qatysty ákimshilik quqyq buzýshylyq týraly 5 hattama jasaldy.
Jalpy, ekologııalyq ınspektorlarmen bıylǵy jyldyń qyrkúıek-qazan aralyǵynda Aqsý, Sharbaqty, Ýspen aýdandary men Pavlodar qalasynda 19 aýyldyq okrýg tekserilgen.
Sondaı-aq, aýyldyq okrýg ákimderine qatysty QR «Ákimshilik quqyq buzýshylyqtar týraly» Kodeksiniń 324 jáne 462 baptary boıynsha jalpy somasy 268916 teńgeni quraıtyn 13 aıyppul salyndy.