Bıyl Parlament 86 zań qabyldady – Senat tóraǵasy
Senat tóraǵasy óz sózinde palata jumysyndaǵy negizgi basymdyqtardyń biri Memleket basshysynyń bastamalaryn zańnamalyq turǵydan qoldaý ekenin aıtty.
«Bıyl Parlament 86 zań qabyldady, onyń 13-ine depýtattar bastamashy boldy. Qabyldanǵan zańdar elimizdiń saıası jáne ornyqty áleýmettik-ekonomıkalyq damýyn qamtamasyz etýdi kózdeıdi. Zań shyǵarý kezinde árbir zań jobasy Senattyń turaqty komıtetterinde jan-jaqty talqylandy. Halyqtyń pikiri men kópshiliktiń úni eskerilip otyrdy. Konstıtýtsııaǵa, sonyń negizinde birqatar konstıtýtsııalyq zańdar men zańnamalyq aktilerge ózgerister men tolyqtyrýlar engizildi. Konstıtýtsııalyq Sot, Adam quqyqtary jónindegi ýákil, Prokýratýra týraly konstıtýtsııalyq zańdar qabyldandy. Qazaqstan Respýblıkasy Prezıdentiniń, Parlamenttiń jáne Úkimettiń quqyqtyq jaǵdaıyn belgileıtin konstıtýtsııalyq zańdarǵa da ózgerister engizildi», – dedi M. Áshimbaev.
Palata tóraǵasy Senattyń turaqty komıtetteri zań shyǵarý qyzmetimen qatar, jyl boıy birqatar mańyzdy is-shara ótkizgenin de tilge tıek etti.
«Senatta «Jańa Qazaqstan: Jastar jáne jańǵyrtý» taqyrybynda parlamenttik tyńdaý ótkizildi. Bıyl 4 úkimet saǵaty uıymdastyryldy. Onda bıýdjetaralyq qatynastardy jetildirý, óńirlerdi gazdandyrý, turǵyn úı qurylysyn damytý, densaýlyq saqtaý júıesiniń qoljetimdiligi men tıimdiligin arttyrý máseleleri qaraldy. Komıtetter 50-ge jýyq kóshpeli otyrys pen dóńgelek ústel otyrysyn uıymdastyrdy. Áriptesterimiz óńirlerde, onyń ishinde shalǵaı aýyldarda jergilikti turǵyndarmen 650-ge jýyq kezdesý ótkizdi. Sonymen qatar, bıyl senatorlar 149 depýtattyq saýal joldady», – dep qorytyndylady Senat tóraǵasy.
Budan buryn habarlanǵandaı, búgin Senattyń jalpy otyrysynda QR Konstıtýtsııalyq Sottyń sýdıalary taǵaıyndaldy.
