Bıyl para alǵan 16 polıtsııa qyzmetkeri ustaldy - ІІM
NUR-SULTAN. QazAqparat – Bıyl para alǵan 16 polıtsııa qyzmetkeri ustaldy. Bul týraly elordada ótken baspasóz máslıhatynda QR ІІM Ózindik qaýipsizdik departamentiniń basshysy Arman Sadanov málim etti, dep habarlaıdy QazAqparat tilshisi.
«2020 jyldyń basynan beri 16 polıtsııa qyzmetkeri para alǵany úshin ustaldy. Ustalǵandardyń arasynda jol-patrýldik polıtsııasynyń qyzmetshileri, tergeýshiler, sondaı-aq QAJ komıteti quramyndaǵy mekemelerdiń ókilder bar. Statıstıkalyq aqparatqa qaraǵanda, ár óńirde bir adamnan anyqtaldy. Bıyl Almaty, Atyraý, Jambyl, Qaraǵandy, Qostanaı, Qyzylorda oblystarynda osyndaı oqıǵalar tirkelmedi. Alǵan paranyń eń joǵary somasy 100 myń teńgeni qurady. Al keshe Petropavlda eki mln teńge somasynda polıtseıdiń para alý kúdigine ilikkeni belgili boldy», - dedi departament basshysy.
Sonymen qatar ol kólikke mas kúıinde otyrǵan polıtseıler týraly aıtyp berdi.
«Osy jyly mas kúıinde kólikti basqarǵan 18 qyzmetshi anyqtaldy. Olardyń, árqaısysy 7 jylǵa óziniń kýáliginen aıyrylady, 15 táýlikke qamalady, sondaı-aq mindetti túrde qyzmetinen bosatylady», - dedi A. Sadanov.
Budan buryn habarlanǵandaı, SQO-da tergeýshi 2 mln teńge para aldy degen kúdikke ilindi.
