Bıyl «Ózbekstannyń jyl muǵalimi» joǵary ataǵyn ulty qazaq Sáýle Polatova jeńip aldy

dep habarlaıdy QazAqparat.

«Qazaqstandaǵy ózbek dıasporasy jáne Ózbekstandaǵy qazaq dıasporasy bizdiń elderdiń arasyndaǵy mańyzdy ári jandy kópir bolyp tabylady. Bul kontekste Sizge, Islam Ábdýǵanıuly, ulttyq mádenı birdeıligin saqtaý boıynsha qazaq dıasporasyna kórsetip jatqan qoldaýyńyz úshin alǵys bildiremin. Aǵymdaǵy jyly «Ózbekstannyń jyl muǵalimi» joǵary ataǵyn ulty qazaq Sáýle Polatovanyń alǵany meni qatty qýantty», dedi Qazaqstan Prezıdenti Nursultan Nazarbaev búgin Tashkentte Ózbekstan Prezıdenti Islam Karımovpen bolǵan keńeıtilgen quramdaǵy kelissózder kezinde.

Osy oraıda Elbasy Qazaqstandaǵy ulty ózbek azamattarǵa da memleket zor kóńil bóletinin atap kórsetti.

Kelissózderden keıingi baspasóz máslıhatynda I. Karımov Ózbekstandaǵy qazaq dıasporasyna barlyq jaǵdaı jasalǵanyn atap kórsetti. Onyń aıtýynsha, jaqynda ǵana Ózbekstannyń Tótenshe jaǵdaılar mınıstri bolyp ulty qazaq azamaty taǵaıyndalǵan. Al jergilikti jerlerdegi zań shyǵarý organdarynda da bes júzden astam qazaq azamaty depýtat bolyp otyr.