Bıyl Oıqaraǵaı kenishi 35 myń tonna kómir óndirmek
NARYNQOL. QazAqparat - Bıyl Almaty oblysyndaǵy Oıqaraǵaı kómir kenishi 35 myń tonna qatty otyn óndirýdi josparlap otyr, dep habarlaıdy QazAqparat tilshisi.
Raıymbek aýdanyndaǵy Oıqaraǵaı kenishi 20 jyldan beri óńir turǵyndaryn kómirmen qamtamasyz etip keledi. Ótken ǵasyrdyń 30-jyldarynda geologtar bul jerden altyn izdeımiz dep barlap, qońyr kómirge tap bolǵan. Bul otynnyń sapasy elimizdiń ózge aımaqtarynda óndiriletin kómirden kem túspeıtinin aıtady mamandar. Oıqaraǵaı ken orny teńiz deńgeıinen 3,5 myń metr bıiktikte ornalasqan. Qońyr kómirdiń boljamdy qory - 70 mln tonnadan asady.
«Ózimizge kelisimshart boıynsha berilgeni - 3 mln tonna. 25 jylda biz osy 3 mln tonnany ıgerip, halyqqa jetkizýimiz kerek», - deıdi seriktestik dırektorynyń orynbasary Oljas Botabekov.
Ken ornynda 30-dan astam adam turaqty eńbek etedi. Budan bólek, júk kóligi bar aǵaıyn halyqqa kómir tasyp tabys tabýda. Sondaı-aq Raıymbek jáne Kegen aýdandarynyń áleýmettik nysandary túgeldeı osy qatty otynmen jylytylady.
«Kishkentaı ǵana shoǵy qalsa, ary qaraı jana beredi. Kúli az, qyzýy kúshti. Kóp otbasylar kúlin dalaǵa tókpeı, baý-baqshalaryna tyńaıtqysh retinde paıdalanady», - deıdi Sarybastaý aýylynyń turǵyny Erjan Moldahmetov
Kómirdiń quramynda zııandy zattar bolmaǵandyqtan qatty otyn káýap ázirleýshilerdiń de kádesine jarap jatyr. Elimizdiń ońtústiginen jylda arnaıy kelip, alyp ketedi deıdi jergilikti turǵyndar.
