Bıyl Otbasy bankiniń 80 myńǵa jýyq klıenti qonys toıyn toılady
Onyń ishinde, memlekettik baǵdarlamalar aıasynda kezekte turǵan 10 518 adam Otbasy bank kómegimen turǵyn úıli boldy. Baqytty otbasy baǵdarlamasy boıynsha 1 247 qazaqstandyqtyń baspana máselesi sheshildi. Shańyraq baǵdarlamasymen 5 989 otbasy jańa qonysqa kóshse, Nurly jer baǵdarlamasynyń arqasynda 3 282 otbasy óz sharshy metrlerine qol jetkizdi.
Búgingi tańda Otbasy bank uzaq merzimdi depozıtter naryǵynda birinshi orynda tur. Qazir banktiń 2,5 mln salymshysy bolashaq baspanalaryna qarajat jınap jatyr. Kún saıyn bankte 2 myńǵa jýyq jańa depozıt ashylady. Olardyń ıeleri alǵashqy jarnaǵa qajetti somany jınap, jyldyq 3,5%-dan 11,5%-ǵa deıingi mólsherlememen nesıe alý múmkindigine ıe bolady. 2022 jyly 600 719 qazaqstandyq Otbasy bankinen jańa depozıt ashqan. Banktiń jalpy depozıttik portfeli 2 trln teńgege teń.
Ipoteka naryǵynda da Otbasy bank kósh bastap tur. Osy jyldyń qorytyndysy boıynsha ol qazaqstandyq ıpotekanyń jalpy úlesiniń 67%-yn bergen. Bul rette bank NPL-diń eń tómengi deńgeıin (90 kúnnen artyq merzimi ótken qaryzdar) saqtap qaldy, qazir ol – 0,08%, al bankter arasyndaǵy bul kórsetkishtiń ortasha deńgeıi 3,68%-ǵa teń.
Turǵyn úı qurylys jınaq júıesine halyq senimi artqan saıyn bank klıentteriniń qatary men olar jasaıtyn operatsııalar sany da kóbeıip keledi. Sondyqtan, qazir banktik protsesterdiń deni tolyqtaı tsıfrlandyrylyp, onlaın rejımge kóshirilip jatyr.
«Bıyl onlaın arnalardyń kómegimen 2,5 mln operatsııa jasadyq. Adamdarǵa qymbat ýaqyttaryn únemdeýge kómekteskimiz keledi. Aldymyzǵa zor maqsat qoıyp otyrmyz – 2025 jylǵa deıin bank usynatyn barlyq operatsııalardy klıentterge onlaın rejımde qoljetimdi etý. Biz EDB-niń ishinde Vlockchain júıesin alǵashqylardyń biri bolyp engizdik. Atalǵan tehnologııany paıdalana otyryp, bank klıentteri nesıeni merziminen buryn ótegen jaǵdaıda, birneshe mınýt ishinde kepil shartyn qashyqtan tirkeı alady nemese kepilde turǵan jyljymaıtyn múlikke tirkelgen quqyqtardy alyp tastaı alady. Búgingi kúni Blockchain 500 myńnan astam saǵatty únemdeýge jáne Otbasy banktiń 30 myńǵa jýyq klıentine qashyqtan suranysqa ıe qyzmetterdi qoldanýǵa kómektesti», - dep túsindirdi «Otbasy Bank» AQ Basqarma tóraıymy Lázzat Ibragımova.
Jańa tehnologııalar jalǵa alý aqysyn sýbsıdııalaý baǵdarlamasyn onlaın, jyldam iske qosýǵa kómektesti. Prezıdentimiz Qasym-Jomart Toqaevtyń tapsyrmasy boıynsha osy jobanyń operatory bolyp Otbasy bank taǵaıyndaldy. Azamattarǵa yńǵaıly bolý úshin ótinish berý, baǵdarlama sharttaryna sáıkestigin tekserý, jalǵa berýshimen kelisimshart jasaý jáne 50% kólemindegi sýbsıdııany alý protsesteri otbasybank.kz tsıfrlyq platformasynda júzege asyp jatyr.
Dál sol otbasybank.kz portalynda qazaqstandyqtar baspana tańdap, memlekettik baǵdarlamalarǵa qatysýǵa ótinish joldaı alady, banktiń jeke baǵdarlamalary aıasynda qurylys salýshydan nemese ekinshi naryqtan eń jaqsy páterlerdi tańdap, satyp ala alady. Kún saıyn platformaǵa shamamen 6000 adam kiredi.
Sondaı-aq, otbasybank.kz saıty arqyly onlaın-ıpotekaǵa da ótinish berýge bolady. Bul qyzmet kommertsııalyq naryqtan jańa nemese qoldanystaǵy turǵyn úıdi satyp alǵysy keletinder úshin qoljetimdi. Bul optsııany qazirdiń ózinde 1 800 adam paıdalanyp úlgerdi.
2022 jyldyń 1 qazanynan bastap bank óz klıentterinen ótemaqy alýǵa ótinishter qabyldaı bastady. Qoldanýshylarǵa yńǵaıly bolý úshin bul protsess onlaın rejıminde iske qosyldy. 2022 jyldyń 26 jeltoqsanyndaǵy jaǵdaı boıynsha, qazaqstandyqtardan jalpy somasy 114 mlrd teńgeni quraıtyn ótemaqy alýǵa 814 myńnan astam ótinish túsken.
Bıylǵy jyl óńirlerde jastardy baspanamen qamtý baǵdarlamalaryn iske qosýda serpindi jyl boldy. Bul baǵdarlamalar jas muǵalimderge, dárigerlerge, jýrnalısterge, mádenıet, sport, áleýmettik sala qyzmetkerlerine, kommýnaldyq qyzmet, ishki ister bólimi, tótenshe jaǵdaılar departamenti qyzmetkerlerine qoljetimdi nesıe alýǵa múmkindik berdi.
Jastar baǵdarlamalaryn júzege asyrý boıynsha jergilikti ákimdikter men Otbasy banktiń jalpy bıýdjeti 62,7 mlrd teńge teń.
Búginde Almaty, Astana qalalarynda jáne Almaty, Atyraý, Qaraǵandy, Qostanaı, Jambyl, Batys Qazaqstan, Aqtóbe, Jetisý, Abaı oblystarynda jastardy turǵyn úımen qamtý baǵdarlamalary iske qosyldy.
Jańa jyldan bastap Otbasy bank Qazaqstanda alǵash ret «jasyl ıpoteka» baǵdarlamasyn iske qospaq. Bul – qazaqstandyqtarǵa «jasyl standarttar» boıynsha salynǵan, energııa únemdeıtin turǵyn úı keshenderinen páter satyp alýǵa nesıe beriledi degen sóz.
«Jasyl ıpoteka» boıynsha alǵashqy jarna – 20 paıyz. Ol bar bolsa, bank klıentteri aldyn ala zaem ala alady. Mundaı nesıe boıynsha mólsherleme 12,5%-ǵa teń. Ony klıent alǵashqy 10 jyl ǵana tóleıdi, keıin bereshek jylyna 3,5%-5%-ǵa deıin tómendeıdi.
«Jasyl ıpoteka» boıynsha nesıeniń eń joǵary somasy – 35 mln teńge. Kredıtti tek jańa baspana satyp alýǵa ǵana qoldanýǵa bolady. Turǵyn úıdi ÓMІR, R MEMST, BREAM nemese LEED standarttaryna sáıkestik sertıfıkaty bar nysandardan ǵana satyp alýǵa bolady.
