Bıyl Óskemende elimizdegi tuńǵysh gematologııa ortalyǵy ashylady
ShQO ákimdiginiń málimetine súıensek, Óskemende túrli kúrdeli otalardy jasaıtyn elimizdegi jalǵyz gematologııalyq ortalyqtyń qurylysy aıaqtalýǵa jaqyn.
«Bul ortalyq halyqaralyq standarttarǵa saı bolady. Munda joǵary dáldiktegi dıagnostıka men zerthanalyq zertteýlerdi júrgizilip qana emes, ǵylymı is-sharalardy ótkizýge, patsıentterdi eń zamanaýı jabdyqty paıdalana otyryp emdeýge múmkindik bar. Onda balalar men eresekterge arnalǵan gematologııalyq bólimsheler, jilik maıyn transplantatsııalaý, radıatsııalyq dıagnostıka, reanımatsııa, genetıkalyq zerthana jáne transfýzıologııa ortalyǵy ornalaspaq», - dedi Danıal Ahmetov.
Bas korpýsta kúndizgi statsıonar men emhana ashylady.
Qazirgi ýaqytta medıtsınalyq kadrlardy daıarlaý, dárigerlerdiń biliktiligin arttyrý máselesi pysyqtalyp jatyr.
«Búginde 29 dáriger Izraılge baryp, bilim alyp jatyr. Olardyń keıbiri balalar onkogematologııasy boıynsha jumys isteıdi. Aldaǵy ýaqytta basqa mamandar Sankt-Peterbýrg pen Mınsk klınıkalaryna oqýǵa barady», - dedi ShQO ákimi.