Bıyl Óskemende 1 myńǵa jýyq úıdi sý basýy múmkin

ÓSKEMEN. QazAqparat – Óskemen qalasynda kún jylynyp, qar erigen kezde 900-den astam úıdi sý basý qaýpi bar, dep habarlaıdy QazAqparat tilshisi.

ShQO tótenshe jaǵdaılar departamenti baspasóz qyzmetiniń málimetine súıensek, qutqarýshylar men jergilikti atqarýshy organ ókilderi sý tasqynyna qarsy sharalar jospary aıasynda sý basý qaýpi joǵary aýmaqtarǵa baqylaý júrgizdi.

Óskemende 900-den astam turǵyn úıdi sý basý qaýpi bar.

Olar Sogra shaǵyn aýdany, Krasın, Ahmer jáne Menovnoe kentterinde ornalasqan.

Búgingi tańda Ahmerdegi Seıfýllın kóshesinde aryq salynyp, Omarov kóshesinde aryq tazalanyp, tereńdetilgen.

Osy sııaqty jumystar Shmelev Log kentinde, «Metallýrg-3» baý-baqsha qaýymdastyǵynda jáne 28 turǵyn úı aýdanynda júrgizildi.

JMK, Ablaketka, Prombaza, Sogra, Kúlenov, Jylandy, Zaşıta, Neftebaza, Prohladnaıa shaǵyn aýdandarynda, Shyǵys, Prýdhoz kentterinde aryqtardy tazalaý jumystary júrgizildi.

Sý tasqyny kezeńine oraı 75 arnaıy tehnıka, 120 adam, 4 tirkemeli jáne 20 tasymaldy motopompa daıyndalǵan.

«Jaqyn arada qutqarýshylar jyl saıyn sý basatyn turǵyn úılerdi aralaýdy bastaıdy. Úı ıelerine aqparattyq jadynama taratylady. Sondaı-aq merdiger uıymdardyń kóktemgi sý tasqynyna daıyndyǵyn tekserý bastalady», - deıdi qalalyq TJB aǵa ofıtseri Valentın Lıtvınenko.