Bıyl orman qorynda órt qaýpi edáýir artady - Ibragım Kúlshimbaev

ASTANA. QazAqparat – Jyl basynan beri 122 orman órti tirkelip, keltirilgen shyǵyn 51 mln teńgeden asty. Bul týraly Úkimet otyrysynda Tótenshe jaǵdaılar birinshi vıtse-mınıstri Ibragım Kúlshimbaev aıtty, dep habarlaıdy QazAqparat tilshisi.

«Qazgıdromet boljamyna sensek, aldaǵy órt qaýipti kezeńde temperatýra ortasha alǵanda +25ºS, respýblıkanyń ońtústik, shyǵys, batys bóliginde temperatýra +30ºS deıin joǵarylaıdy. Bul orman qorynda órt qaýpin edáýir arttyrady. Jyl basynan beri 122 orman órti tirkeldi, órttiń jalpy aýdany - 19 myń gektardan asty jáne 51 mln teńgeden asatyn shyǵyn keldi. Dala alqaptarynda da osyndaı jaǵdaı qalyptasyp otyr», - dedi birinshi vıtse-mınıstr.

Máselen, onyń dereginshe, ótken jyly 111 dala órti tirkelip, órt jalmaǵan alań 55 myń gektardy qurady. Bul rette eki adam qaza taýyp, úsheýi jaraqat aldy, shamamen 500 bas mal órtendi.

«Mıneraldanǵan jolaqtardyń joqtyǵynan daladan 127 órt orman alqaptaryna aýysty. Onyń negizgi úlesi jergilikti atqarýshy organdardyń baqylaýyndaǵy ormandarǵa tıesili. Bıyl órt qaýipti kezeń bastalǵannan beri eki dala órti tirkeldi. Jalpy aýdany - 780 gektar jáne 605 dala órti tirkelip, jalpy aýdany 2 503 gektardy qurady. Óńirlerdegi temperatýralyq fonnyń ulǵaıýy jáne ekpindi jeldiń saldarynan órtterdiń tez órshýi turǵyn úı sektorynda órt jaǵdaıyn nasharlatatynyn aıta ketý kerek. Janǵan qurǵaq shóp turǵyn jáne saıajaı úılerine aýysýynyń 14 jaǵdaıy tirkeldi. Mysaly, Petropavl qalasynda qamys órti jaqyn mańdaǵy jeke turǵyn úılerge jaıyldy», - dedi Ibragım Kúlshimbaev.