Bıyl orman alqaptaryndaǵy órt oqıǵalary ótken jylmen salystyrǵanda 20,4 paıyzǵa kóp bolyp otyr - TJM
A. Mamyrdyń 19-y. QazAqparat /Aıdar Ospanalıev/ - Bıylǵy jyly elimizde oryn alǵan órt oqıǵalary ótken jylmen salystyrǵanda 20,4 paıyzǵa kóp bolyp otyr. Bul týraly búgin jýrnalıstermen órt qaýipsizdigine baılanysty ótken baspasóz máslıhatynda Tótenshe jaǵdaılar mınıstrliginiń ókilderi málim etti,
dep habarlaıdy QazAqparat.
Mınıstrliktiń baspasóz qyzmetiniń jetekshisi Eldor Raıymbekovtyń aıtýynsha, elimizdiń orman alqaptary men dalalyq jerlerde kúnniń jylynýyna baılanysty órt qaýpiniń arta túsetin kezi. «Jalpy, elde jylyna 19 myń órt oqıǵasy oryn alatyn bolsa, olardyń 7 myńy, ıaǵnı 40 paıyzy aýyldyq aımaqtardyń úlesinde. Al 2009 jyly elde 344 dalalyq aımaqtarda órt shyǵyp, 79 myń gektar aımaqty jalyn sharpydy. Odan kelgen shyǵyn 13 mıllıon teńgeden asyp, 6 adam mert boldy. Taǵy 3 adam dene jaraqattaryn aldy. Al ótken jyly ormandy alqaptarda oryn alǵan órt oqıǵalary 529, odan kelgen shyǵyn 90 mıllıon teńge. Tilsiz jaý 4 myń 392 gektar ormandy kúl etti», dedi baspasóz qyzmetiniń jetekshisi.
Onyń derekteri boıynsha, 2010 jyldyń osy ýaqytyna deıin ormandy alqaptarda respýblıka boıynsha 100 ret órt shyǵyp, odan kelgen shyǵyn 3 mıllıon teńgeni quraǵan. 1 myń 183 gektar aımaq janyp ketken. «Bul ótken jyldyń sáıkes merzimimen salystyrǵanda, 20,4 paıyzǵa kóp bolyp otyr. Órt oqıǵalarynyń basym bóligi Soltústik Qazaqstan, Pavlodar, Qaraǵandy, Qostanaı oblystarynda oryn aldy», dedi E.Raıymbekov.
